Քո ցավը` Հայրենի'ք, Կրակե շապիկ է. Հագնում եմ` վառում է, Հանում եմ` մեռնում եմ...

ՎԱՐԴԳԵՍ ՊԵՏՐՈՍՅԱՆ

Կառավարությունը հիմա չունի սատարող քաղաքական ուժ Աժ-ում, և ցանկացած օրենսդրական նախագիծ ՀՀԿ-ն կարող է սաբոտաժի ենթարկել. Լենա Նազարյան

am
 Karhavarowt`yowne hima ch`owni satarogh k`aghak`akan owzh Azh-owm, ew ts`ankats`ats orensdrakan nakhagits HHK-n karogh  e sabotazhi ent`arkel. Lena Nazaryan_95427

ՀԱՅ ՁԱՅՆ լրատվականի զրուցակիցն է Ազգային ժողովի «Ելք» խմբակցության պատգամավոր, «Քաղաքացիական պայմանագիր» կուսակցության անդամ ԼԵՆԱ ՆԱԶԱՐՅԱՆԸ:

-Օգոստոսի 17-ի հանրահավաքի ընթացքում վարչապետ Նիկոլ Փաշինյանը հայտարարեց, որ նախաձեռնում են սահմանադրական փոփոխություններ, օրերս էլ՝ հարցազրույցներից մեկում նշեց,թե փոփոխությունների փաթեթը շուտով կհանձնվի Ազգային ժողով: Ինչո՞ւ անհրաժեշտություն առաջացավ փոփոխել գործող Սահմանադրությունը, և  ի՞նչ նպատակով են կատարվելու այդ փոփոխությունները:

-Մայիսին կառավարման եկան նոր ուժեր, և Ազգային ժողովն ընտրեց նոր վարչապետ,   ձևավորեց նոր կառավարություն: Սակայն խորհրդարանն ու կառավարությունը ներկայացնում են տարբեր քաղաքական ուժեր, և ըստ այդմ՝ առկա է սահմանադրական ճգնաժամ: Առաջացած իրավիճակը կարգավորելու նպատակով  անհրաժեշտ է իրականացնել սահմանադրական փոփոխություններ, որպեսզի լուծարվի գործող խորհրդարանը և անցկացվեն արտահերթ ընտրություններ:

Թվարկեմ մի քանի հիմնավորումներՆախ, կառավարման խորհրդարանական ձևի դեպքում գործադիրն ու օրենսդիրը՝ տարբեր քաղաքական ուժեր լինելու պարագայում, կարող են առաջացնել կառավարման ճգնաժամ: Կառավարությունն՝ ի դեմս ԱԺ-ի, պետք է ունենա իր ծրագրերը սատարող ու հաստատող գործընկեր մարմին: Հիմա այնպիսի իրավիճակ է, որ կառավարությունը չունի սատարող քաղաքական ուժ Ազգային ժողովում, և ցանկացած օրենսդրական նախագիծ կարող  է սաբոտաժի ենթարկվել, ձգձվել, փոփոխվել: Հնարավոր է՝ խորհրդարանական մեծամասնությունը չխոստովանի, որ չի ուզում կառավարության ներկայացրած ինչ-որ օրենքի դեմ քվերակել, այլ փորձի տարբեր քննարկումներ ծավալել, երկարաձգել օրենքի ընդունման ընթացը կամ արգելակել դրա ընդունումը:

Բացի այդ, արտահերթ ընտրություններ անցկացնելու նպատակն ամրագրված է նաև Ազգային ժողովի կողմից հաստատված կառավարության ծրագրում, որը վարչապետ Նիկոլ Փաշինյանն է ներկայացրել՝ ասելով, որ ամենաուշը մեկ տարվա ընթացքում պետք է տեղի ունենան արտահերթ ընտրություններ:

Վերջին հիմնավորումն էլ այն է, որ գործող խորհրդարանը չի արտահայտում հանրության տրամադրությունները: Դա շատ հաստակ է, և այն հանգամանքը, որ Հանրապետական խմբակցությունը կառչել է Ազգային ժողովից, բոլորովին չի բխում հանրության շահերից և կամքից: Խնդիրն այն է, որ նրանք հասկանում են՝  դա իշխանության մեջ լինելու իրենց  վերջին շանսն է, որովհետև, նվազագույնը՝ առաջիկա 10 տարիների ընթացքում, Հանրապետական անվանում կրող  կուսակցությունն ուղղակի դատապարտված է ձախողման: Այդ իսկ պատճառով՝ նրանք հիմա կարող է փորձեն սաբոտաժ անել այն սահմանադրական փոփոխությունները, որոնք անհրաժեշտ են Ազգային ժողովը լուծարելու համար:

-Այսինքն , սահմանադրական փոփոխությունները հիմք են ստեղծելու Ազգային ժողովն անցնցում լուծարելու համա՞ր:

-Միանշանակ, խնդիրն Ազգային ժողովի լուծարումն է,իսկ Սահմանադրության փոփոխությունն այն միջոցն է, որը կապահովի այդ  նպատակի իրականացումը, այսինքն՝  արտահերթ խրհրդարանական ընտրությունների անցկացումը: Դա մեր քաղաքական թիմի խոստումն էր, որ պետք է լինեն նոր խորհրդարանական ընտրություններ, քանի որ միայն  այդ ճանապարհով է հնարավոր լուծել քաղաքական ճգնաժամը:

-Օրերս ՀԱՅ ՁԱՅՆ-ի հետ զրույցում,  ՀՀԿ խմբակցության ղեկավար Վահրամ Բաղդասարյանը նշել էր՝ թեև Նիկոլ Փաշինյանը մեղադրում էր Սերժ Սարգսյանին՝ «իր հագով» Սահմանադրություն կարելու և սուպերվարչապետական համակարգ ստեղծելու մեջ, սակայն այսօր Փաշինյանն է փորձում Սահմանադրությունը հարմարեցնել իրեն՝ միաժամանակ  օգտվելով սուպերվարչապետության հնարավորությունները: Ինչպե՞ս կպատասխանեք այս դիտարկմանը:

-Պարոն Փաշինյանը հստակ խոսել է դրա մասին և ասել, որ անպայման պետք է լիազորություններն այնպես բաշխվեն կառավարությունում, որ գործի վերահսկողության ու հակակշիռների մեխանիզմը: Դրա մասին Փաշինյանը խոսել է պատգամավորության տարիներին, ինչպես նաև՝ վարչապետ ընտրվելուց հետո: 

-Իսկ գործնականում դա ե՞րբ պետք է լինի, ընտրություններից հետո՞:

-Ես չեմ կարող ասել, թե գործնականում դա երբ է հնարավոր անել, որովհետև օրակարգում  հիմա այնպիսի մեծ ու բարդ խնդիրներ են, որոնց հանգուցալուծումը միայն հնարավորություն կտա մտածել այդ հարցի մասին: Առաջնային հարցը հիմա Ազգային ժողովի լուծարումն է, ու դրա հիմնավորումներն ավելի քան հստակ են, այլ բան չեմ կարող ավելացնել:

-Առաջիկա ամենակարևոր ներքաղաքական իրադարձությունը Երևանի ավագանու ընտրություններն են: Կարծես թե, մրցակցությունը շատ մեծ է լինելու, մասնակից ուժերն էլ՝ բավական ակտիվ: Որպես իշխող կուսակցության ներկայացուցիչ՝ ի՞նչ ակնկալիքներ և սպասումներ ունեք այս ընտրություններից: Արդյո՞ք այս անգամ ականատես կլինենք ազատ ու թափանցիկ քվեարկության:

-Միանշանակ: Հիշեք, թե ինչ խնդիրներ են եղել նախկին ընտրությունների ժամանակ, մեկ տարի առաջ: Առաջին խնդիրը ընտրակաշառքի բաժանումն էր: Մենք հիշում ենք Երևանի քաղաքապետի ընտրության ժամանակ «Զիբիլիքս» անունը կրող հայտնի քրեական գործը, որով վերջերս մի քաղաքացի է ձերբակավել: Կարող եմ ասել, որ նշված պատմության մեջ այդ և մյուս մասնակիցների դերը երկրորդական է, որովհետև պետք է հայտնաբերել կազմակերպչին ու քաղաքական պատվիրատուին, իսկ այդ գործը կապված էր Տարոն Մարգարյանի ընտրական շտաբի հետ:  Իրավապահ մարմիններն ունեն և՛ փաստեր, և՛ ազատություն՝ հայտնաբերելու Տարոն Մարգարյանի շտաբի կապն այդ ամենին:

 Երկրորդ խնդիրը եղել է վարչական ռեսուրսի չարաշահումը: Մենք հիշում ենք դպրոցների տնօրենների հեռախոսազրույցները, որտեղ նրանք թվեր էին հայտնում՝ չիմանալով, թե ո՞ւմ հետ են զրուցում: Հիմա այդ բոլորը բացառվելու են: Դպրոցի տնօրեններին արդեն իսկ զգուշացվել է, որ որևէ կերպ չպետք է միջամտեն քաղաքական գործընթացներին, չպետք է ծնողներին հարկադրեն  ինչ-ինչ գործողություններ անել:

Օրերս էլ  հաստատվեց  «Քրեական օրենսգրքում» փոփոխությունների փաթեթը,  որով խստացվեցին ընտրակաշառքի համար պատիժները՝և՛ կաշառք տալու, և՛ ստանալու համար, բացի այդ, ընտրակաշառք տալու համար նախատեսվեց առավելագույնը 6 տարի ազատազրկում: Այսուհետ այդ հանցագործությունը դիտարկվելու է որպես ծանր հանցագրոծություն, և իրավապահ մարմինները հնարավորություն են ունենալու ձեռնարկել օպերատիվ-հետախուզական միջոցառումներ, այդ թվում՝ գաղտնալսում, որպեսզի բացահայտեն  այս տեսակ հանցագործությունները:

Իրավապահ մարմինները վաղուց գիտեն, թե ո՞ր թաղում, ո՞ւմ ձեռքն է սովոր ընտրակաշառք բաժանելը, և հաստատ նրանց տեղն էլ գիտեն,  հայտնաբերելու ձևն էլ գիտեն: Այնպես որ, այս ամենն իրականացնելու համար անհրաժեշտ է քաղաքական կամք, որը կա, և մենք ականատես կլինենք բացառիկ արդար և ազատ ընտրությունների: Իհարկե, դա չի նշանակում, որ ընտրություններից հետո  քիչ ձայներ հավաքած մարդիկ կամ ուժերը հայտարարություններ չեն անի, խնդիրներ չեն մատնանշի: Ես  դա չեմ բացառում: Համենայն դեպս, վերջին 20 տարիների ընթացքում առաջին անգամ ՀՀԿ-ն չի մասնակցի ընտրություներին, և այդ հանգամանքը կարելի է դիտարկել որպես ինքնախոստովանանք, որ նախկինում ինչ-ինչ միջոցներով են ձայներ հավաքել:

Մեկ այլ կարևոր հարցի էլ կցանկանայի անդրադառնալ: Նայում եմ ավագանու ընտրություններին մասնակցող 13 քաղաքական ուժերի ցանկին և ափսոսում եմ , որ ոչ մի նոր քաղաքական ուժ՝ հեղափոխությունից ծնված ուժ ներկայացված չէ: Հուսով եմ, որ խնդիրը ժամանակի սղությունն է, և ապագայում վստահաբար կլինեն քաղաքական նախաձեռնություններ, միավորումներ, որոնք կհասցնեն խորհրդարանական ընտրություններին մասնակցել: Դա շատ կարևոր է, որովհետև մենք քաղաքական դաշտում նոր, թարմ ուժերի կարիք ունենք, և վստահաբար, կա այդ ռեսուրսը: 

-Հեղափոխությունից հետո ձեր քաղաքական ուժի, և հատկապես, Նիկոլ Փաշինյանի վարկանիշը շատ մեծ է Հայաստանում, և դա առիթ է հանդիսանում, որ շատերը ցանկանան անդամագրվել «Քաղաքացիական պայմանագրին»: Վերջերս էլ անուններ հնչեցին,  որոնք համալրել են ՔՊ-ի շարքերը: Կար ժամանակ, նման հոսք կար դեպի  Հանրապետական կուսակցությունում, այդ գործընթացը Ձեզ չի՞ անհանգստացնում:

-Մեր թիմն այդպիսին չէ: Մենք որդեգրել ենք ներառող քաղաքականություն, իսկ «Իմ քայլը»  դաշինքի ցուցակը անվանում ենք հեղափոխականների ցուցակ: Այնտեղ ներգրավված են  և՛ կուսակցության անդամներ, և՛ տարբեր կուսակցոթյուների համակիրներ, և՛ անհատներ ու նախաձեռնություններ: Մեր խնդիրն էր, որ այն մարդիկ, ովքեր հեղափոխության արժեքի կրողն են և մասնակցել են հեղափոխությանը, ինչպես նաև փորձագիտական ներուժ, հնարավորություն ստանան լինելու ավագանիում, խորհրդարանում, և իրենց ծառայությունը մատուցեն մեր պետությանը: Ավագանու մեր ցուցակում կան նաև հանրային գործիչներ, ովքեր տարիներ շարունակ խոսել են  տարբեր խնդիրներ մասին և ունեցել  են այն մերժվածության զգացումը, ինչն  էլ մարդկանց փողոց դուրս բերեց: Հիմա նրանց համար հնարավորություն է ստեղծվել գործելու, ու մեր խնդիրն է՝ տալ այդ հարթակը, որպեսզի իրենք կարողնանան մատուցել իրենց ծառայությունը:

Իհարկե, չեմ բացառում, որ կլինեն նաև պատեհապաշտներ, սակայն ես հավաստիացնում եմ, որ նրանք ձեռնունայն կհեռանան, որովհետև եթե նրանց ակնկալիքն է, որ ըտրությունների ժամանակ ինչ-որ փողի շրջանառություն լինի, կամ իրենք պաշտոնի են հավակնում՝ զուտ կուսակցական լինելու փաստով պայմանավորված, ապա նրանք հիասթափված կհեռանան: Մենք բացառելու ենք փողի շրջանառությունն ընտրություններում, մեր ֆինանսական բոլոր հաշվետվությունները թափանցիկ են, մենք ստանում ենք նվիրատվություններ, որ օգտագործում ենք բացառապես գրասենյակներ վարձելու և դրանք պահելու համար, և այդ ամենը թափանցիկ է:

Ինչ վերաբերումէ  պաշտոնների ակնկալիքին, ես կարող եմ վստահաբար ասել, որ կուսակցական լինելու փաստը չի նշանակելու ավտոմատ պաշտոն ստանալու հնարավորություն: Շատ ուժեղ մրցակցություն է լինելու, և եթե մարդն ունի պաշտոնի հավակնություններ, պետք է դրա հետ միասին ունենա նաև կարողություններ, իմացություն, փորձ, պատրաստակամություն, արժեքներ և այլն:

-Օրերս խորհրդարանում ճեպազրույցի ժամանակ Դուք ասել էիք՝ մեծ է հավանականությունը, որ խորհրդարանական ընտրություններին էլ «Քաղաքացիական պայմանագիրը» կմասնակցի միայնակ՝ առանց «Ելք» դաշինքի: Ինչո՞ւ, այնուամենայնիվ, ՔՊ-ն ընդհանուր հայտարարի չեկավ դաշինքի մյուս կուսակցությունների հետ:

-Իմ անձնական կարծիքն եմ ասում, ոչ թե վարչության պաշտոնական դիրքորոշումը՝ խնդիրը հետևյալն է, որ մեր նախընտրական ցուցակները պետք է կազմված լինեն ոչ թե դաշինքային կարգով, այլ բաց լինեն հանրության համար: Մենք պետք է ՔՊ-ի ցուցակում ներգրավենք այն մարդկանց, ովքեր ունեն ներուժ, ցանկություն, պատրաստակամություն մասնակից դառնալու փոփոխություններին, ովքեր հեղափոխության արժեքների կրողն են: Եթե մենք դաշինքով գնանք ընտրությունների, դա նշանակում է, որ մեր ցուցակը հիմանակում բաղկացած է լինելու այդ կուսակցությունների անդամներից,  նաև կարող է պատահել, որ մենք չհամընկնենք  մեր արժեքային համակարգով, գաղափարներով և այլն: Դա իմ անձնական մոտեցումն է: Մենք՝ որպես կառավարող ուժ, այս պահին հանրային մեծ աջակցություն  ենք վայելում, և պարտավոր ենք մեր ցուցակներում ներառել մարդկանց, ովքեր իսկապես պատրաստ են այդ մեծ պատասխանատվության բեռը վերցնելու՝և՛ ավագանիում, և՛ խորհրդարանում, և՛ կառավարությունում:

-Ստացվում է՝ մյուս կուսակցությունների հետ դաշինքում լինելը խոչընդոտո՞ւմ էր այդ նպատակի իրագործմանը:

-Ես չեմ բացառում, որ մեր գործընկերները նույնպես կարող են ստանձնել այդ պատասխանատվությունը, մանավանդ, որ կառավարությունում ունենք մեր դաշինքնի անդամ կուսակցությունների անդամներ, և կարծես թե, նրանք լավ կատարում են իրենց աշխատանքը: Բայց խնդիրը նաև այն է, որ նախընտրական ցուցակը, ավագանու տեղերը, ԱԺ տեղերը սահմանափակ են, և որպեսզի մենք հնարավորություն ունենանք իսկապես ներգրավել նոր մարդկանց, հետևաբար ցուցակն այլևս չի կարող կազմվել զուտ դաշինքային տրամաբանությամբ: Ես միանշանակ չեմ բացառում իրենց հետ համագործակցությունն Ազգային ժողովի ընտրությունների ժամանակ, բայց միանշանակ կարող եմ ասել, որ այդ ցուցակը մենաշնորհված չի և պետք է բաց լինի հանրության շատ ներկայացուցիչների համար: Զուտ դաշինքային ցուցակներ չեն կարող լինել այլևս:

-Այսինքն, Ելք դաշինքի մյուս երկու ուժերի հետ խնդիրներ, տարաձայնություններ չկա՞ն:  Մամուլում վերջին օրերին տեղեկություններ էին շրջանառվում, որ ՔՊ-ի և «Լուսավոր Հայստան»,«Հանրպետություն» կուսակցությունների  միջև մեծ լարվածություն կա: Նույնիսկ ակնարկ եղավ, որ ՔՊ-ի անդամները Արտակ Զեյնալյանին մեղադրում են իր ծառայողական մեքենան անձնական նպատակներով օգտագործելու մեջ:

-Ոչ, բացարձակ լարվածություն չկա: Խորհրդարանում «Ելք» խմբակցությունն աշխատում է նորմալ, բոլորը զբաղված են ընտրություններով, բոլորի համար շատ կարևոր շրջան է սկսվելու. Երևանի ավագանու ընտրությունների քարոզարշավը շատ կարճ է տևելու, և ես հուսով եմ, որ բոլորն էլ կկարողանան դրական ու բարեխիղճ քարզարշավ իրականացնել միմյանց հանդեպ, և հնարավորություն տալ, որ երևանցիներն առանց ավելորդ լարվածության մասնակցեն ընտրություններ, և վերջապես մենք ունենանք ազատ ու արդար ընտրություններ, առանց հետընտրական սթրեսների:

Ինչ վերաբերվում է Արտակ Զեյնալյանի ծառայողական մեքենայի հարցին, ես մամուլից տեղեկացա, որ  պարոն  Զեյնալյանի  ծառայողական մեքենան սխալ տեղում էր կայանվել, դա նկատել էին լրագրողները և հրապարակել. Դա մեզ հետ կապ չունի: 

-Ընտրություններից հետո  հնարավոր հանարո՞ւմ եք նախկին գործընկերների հետ կոալիցիայի ստեղծումը:

-Ես միանշանակ կարող եմ ասել, որ եթե ստանանք երևանցիների ձայների մեծամասնությունը, ապա որևէ ուժի հետ կոալիցիա չենք կազմի, սակայն եթե կոալիցիա կազմելու անհրաժեշտություն լինի, որպեսզի կարողանանք քաղաքապետ ընտրել, ապա կմտածենք: Դա կախված կլինի ուժերի դասավորվածությունից:

Հարցազրույցը վարեց՝ ԳՈՀԱՐ ԱՎԵՏԻՍՅԱՆԸ

Լրահոս

Օրվա թեմաները

Ամենաընթերցվածը

Նմանատիպ նորություններ