Ով հայ ժողովուրդ, քո միակ փրկությունը քո միասնական ուժի մեջ է

Չարենց

Կը հարուածե՞ն Դամասկոսը. Ինչքանով իրաւացի ե՞ն Ամերիկեան սպառնալիքները

am
Ke harowatse?n Damaskose. Inch`k`anov irawats`i e?n Amerikean sparhnalik`nere_54091

Միջազգային լրահոսի գլխաւոր թեման Միացեալ Նահանգներու կողմէ Դամասկոսի դէմ տրուելիք հարուածի մը հաւանականութեան մասին է: Ի դէպ առաջին անգամը չէ, որ Սուրիոյ իշխանութեան հիմնական կեդրոնատեղին թիրախ դարձնելու մասին խօսակցութիւններ կը հնչեն:

Նոյնը տեղի ունեցաւ 2012 թուականին, երբ ԱՄՆ նախագահ Պարաք Օպամա ի տես Դամասկոսի Ղութա շրջանին մէջ քիմիական զէնքի օգտագործման Սուրիոյ վարչակարգին դէմ սպառնալիքներ հնչեցուց ու մի քանի օր աշխարհը «շնչակտուր» պահելէ ետք հրաժարեցաւ զինուորական հարուած մը տալու գաղափարէն: Խորքին մէջ ինչ փոխուած է 2012 թուականէն ասդին եւ ինչն է, որ կը մղէ նախագահ Թրամբը զինուորական սցենարի մը մասին խօսելու, մանաւանդ այն հանգրուանին երբ մայրաքաղաք Դամասկոսը կը պատրաստուի անցնիլ Ասատեան բանակի ամբողջական տիրապետութեան տակ: Նախ պէտք է հաշուի առնել, որ յատկապէս վերջին մէկ տարուան ընթացքին Սուրիոյ մէջ գրանցուած զարգացումներուն հետեւանքով Ամերիկացիք ու անոնց դաշնակիցները մեծ գետին մը կորսնցուցած են Սուրիոյ ընդհանուր տեսարանին մէջ: Յիշեցնենք նաեւ, որ «Իսլամական պետութիւն» կոչուած ահաբեկչական խմբաւորման ազդեցութիւնը նօսրացած է եւ եթէ ուշադիր հայացք մը ուղղենք Սուրիոյ զինուորական քարտէզին վրայ, ապա պիտի տեսնենք, որ սուրիական բանակը մօտեցած է ամբողջ երկիրը իր տիրապետութեան տակ առնելու փուլին: Երբեմնի «չափաւորական» ընդդիմութեան շապիկով հանդէս եկող եւ տարբեր անուններով յայտնի խմբաւորումները քաշուած են Իտլիպ, իսկ Դամասկոսը թիրախ դարձնող «Ժայշ ալ իսլամ» խմբաւորումն ալ ռուսական կողմին հովանաւորութեամբ համաձայնեցաւ դուրս գալ շրջանէն այդպիսով փակելով Սուրիոյ մայրաքաղաքը տարբեր մակարդակի վտանգներու տակ ձգելու փուլը:

 

Այս բոլորէն զատ անշուշտ կայ Սուրիոյ հիւսիսային հատուածներուն մէջ «գործօն»ի վերածուիլ փորձող քրտական զինեալ խումբերու օրակարգը, որուն դիմաց ալ ձեռք կ'առնուին յատուկ միջոցներ, անշուշտ բոլորն ալ Մոսկուայի հետեւողական ճիգերուն եւ ծրագիրներուն շնորհիւ: Ճիշդ է, որ Թուրքիոյ զինուորական միջամտութիւնը եւ յատկապէս Աֆրինի զարգացումները «հաճելի» դէպքեր չեն Պաշշար Ասատին համար ու շատ հաւանական է, որ Սուրիոյ կառավարութիւնը յատկապէս «թրքական օրակարգ»ով ունի որոշ «ապահովեցումներ», բնականաբար Մոսկուայի կողմէ:

 

 

Ամերիկեան «սպառնալիքներ»ը ուրեմն ի հրապարակ կը հանուին այն պահուն, երբ Սուրիոյ մէջ ռազմական գործողութիւններու փուլը հասած է նուազագոյն մակարդակի մը տեղ տալով քաղաքական ընտրանքներու, երկխօսութեան եւ տագնապը քաղաքական հարթակի վրայ լուծելու ընտրանքներուն:

Ու այս առումով ալ երբեք չէ բացառուած, որ «անկանխատեսելի» մօտեցումներով յայտնի ԱՄՆ նախագահը ընթացք տայ, անկանխատեսելի ռազմական միջամտութեան մը, որուն հիմնական նպատակը պիտի ըլլայ քաղաքական լուծումներու օրակարգի խնդիրը մէկդի շպրտել եւ Սուրիոյ իրավիճակը դարձնել տագնապալի: Հարցում, ո՞վ պիտի ըլլայ հիմնական օգտուողը զինուորական հարուածի մը պարագային, մանաւանդ որ տարիներ առաջ «շրջանառութեան» մէջ դրուած ամէն տեսակի սցենարները դարձած են անուժ: Խօսքը արեւմուտքի կողմէ Ասատը տապալելու մասին է, ու այս առումով արեւմտեան «պլոք»ը տարբեր առիթներով գաղափար ունեցած է «արագ հարուած» մը տալ Դամասկոսին ու ատոր զուգահեռ շարժել ընդդիմադիր ջոկատները Սուրիոյ նախագահական պալատին ուղղութեամբ: Այսօր իրականութիւնը բոլորովին տարբեր է, մանաւանդ որ ընդդիմադիր քօղով հրապարակ ելած ուժերը յայտնուած են իրենց մաշկը պաշտպանելու դրոյթին մէջ ու անոնք բոլորն ալ հեռու են յարձակողական դիրքերէ:

 

Ամէն պարագայի տակ այս օրերուն հնչած ամերիկեան սպառնալիքները ցոյց կու տան մէկ բան, որ Սուրիոյ մէջ իրական խաղաղութիւն մը յառաջ բերելու քաղաքական կամքը կը շարունակէ մնալ սառած «զէրօ» կարգավիճակի մը մէջ:

 

Հատուկ ՀԱՅ ՁԱՅՆի համար

Լրահոս

Օրվա թեմաները

Ամենաընթերցվածը

Նմանատիպ նորություններ