Մեր, թշնամու և միջազգային հանրության քաղած դասերն ապրիլյան պատերազմից. մեկնաբանում է Դավիթ Բաբայանը

am
Mer, t`shnamow ew mijazgayin hanrowt`yan k`aghats dasern aprilyan paterazmits`. meknabanowm e Davit` Babayane_6622

Ապրիլյան պատերազմից դասեր քաղել ենք բոլորս, որովհետև ենթարկվել ենք այդ ագրեսիային:  Այս մասին «Արցախպրես»-ի թղթակցի հետ զրույցում ասել է ԱՀ նախագահի մամուլի քարտուղար Դավիթ Բաբայանը՝ նշելով, որ դասեր քաղել է նաև միջազգային հանրությունը, հաշվի առնելով տարածաշրջանի կարևորությունը աշխարհաքաղաքականության համար, և իհարկե, Ադրբեջանը:

«Մեր հիմնական դասն այն է, որ ևս մեկ անգամ ապացուցվեց Ադրբեջանի՝ ագրեսիվ, հարձակողական ահաբեկչական պետություն լինելու փաստը: Այդ երկիրը որևէ ձևով չի փոխել իր տեսլականը, և նրա միակ նպատակն Արցախի ոչնչացումն է. սա փաստ է, և նշանակում է, որ այս դասերի ներքո բնական է, որ մի շարք հետևություններ են արվել տարբեր ոլորտներում: Առաջին հերթին պաշտպանունակության ոլորտում. ամրապնդվում է սահմանը, կատարվում են նաև այլ աշխատանքներ, շտկումներ են մտցվում ռազմավարության, մարտավարության մեջ, իհարկե, նաև տնտեսական, հոգեբանական, դաստիարակչական ոլորտներում: Այս բոլոր ասպարեզներում համապատասխան հետևություններ արվում են, և արդեն իսկ տեսանելի է սահմանի ամրությունը:

Այդ աշխատանքները շարունակվելու են, որովհետև ժամանակակից պատերազմը թելադրում է նոր կանոններ, և նոր զինտեխնիկայի համալրումը մեր բանակի կարևորագույն ուղղություններից մեկն է: Այս հարթությունում մենք ունենք մեծ ձեռքբերումները»,- ասել է Դ. Բաբայանը: Խոսելով այս առումով միջազգային հանրության մասին՝ ԱՀ նախագահի մամուլի քարտուղարը նշել է, որ իրավիճակը կարող է ցանկացած պահի ապակայունանալ և դրա համար նրանց կողմից ավելի մեծ ջանքեր է պետք ուղղել, որպեսզի տարածաշրջանում կայունությունը պահպանվի: Նրանք բազմից հասկացնել են տվել, որ հարցն ուժային տարբերակով լուծելու ցանկացած փորձ անընդունելի է, ինչը շատ կարևոր է: Միջազգային հանրությունը տեսավ, որ Մայր Հայաստանը, Սփյուռքը հաստատակամ են և պաշտպանելու են Արցախի անկախությունը, անվտանգությունն ու արժանապատվությունը:

Դ. Բաբայանի խոսքով՝ ապրիլյան պատերազմից Ադրբեջանի հետևությունը մեր հզոր հակազդեցությունը տեսնելն էր՝ չնայած չի փոխել իր տեսլականը, բայց դա իր խնդիրն է:

«Մենք չենք պատերազմում Ադրբեջանի ժողովրդի դեմ, ադրբեջանական ժողովուրդն ինքը իր սեփական իշխանության գերին է, և այդ իշխանությունները մեծ վտանգ են բուն Ադրբեջանի համար: Մեր ռազմավարության տեսլականը հիմնված է ակտիվ պաշտպանության վրա, ինչը նշանակում է, որ մենք երբևիցե ագրեսոր չենք լինելու: Բայց եթե, Աստված մի արասցե, նորից լինի պատերազմի վերսկսման փորձ, ապա ոչ միայն կասեցնելու ենք, այլև ռազմական գործողությունները տեղափոխելու ենք թշնամու տարածք: Մենք ունենք բոլոր հնարավորությունները, և ավելի քան համոզված եմ, որ Ադրբեջանը պարզապես պատերազմում հաջողության հասնելու որևէ շանս չունի, և այդ երկրի իշխանությունները լավ են պատկերացնում, որ սահմանափակ ինչ-որ թատերաբեմ այլևս չի լինելու, ու միայն սահմանամերձ շրջանները չէ, որ լինելու է պատերազմի գոտի, այլ՝ ողջ Ադրբեջանը»,- ընդգծել է Դ. Բաբայանը:

Լրահոս

Ամենաընթերցվածը

Նմանատիպ նորություններ