Աշխատեք ձեր սիրտը պահել մաքուր ու լիքը ամենալավ ու ամենաբարի զգացմունքներով ու մարդուն նայեցեք բարի սրտով ու պայծառ հայացքով:
Հովհաննես Թումանյան

ԱՄՆ չեղարկում է Արցախին տրամադրվող օգնությունը և կրճատում Հայաստանին տրամադրվելիքի չափը

amn-cexarkoum-e-arcaxin-tramadrvox-ognoutyoune-e-krjatoum-hayastanin-tramadrveliqi-cape

Նախօրեին հայտնի դարձավ, որ ԱՄՆ-ը կրճատում է Հայաստանին տրամադրվելիք օգության չափը: Շրջանառվող տեղեկությունների համաձայն՝ գալիք 2020թ բյուջեյով նախատեսված է 6.75 մլն դոլարի չափով օգնություն տրամադրել մեր հանրապետությանը։

Հարկ ենք համարում հիշեցնել, որ Հայաստանին  տրամադրվելիք օգնությունը «Foreign Assistance»-ի միջոցով սկսել է պարբերաբար կրճատվել 2017թ սկսած, և վերջին երկու տարիներին այն 6 միլիոն դոլարից մի փոքր ավելի է կազմել: Եղել են տարիներ, երբ օգնության չափը կազմել է 80 մլն դոլար և ավելի։

 

Հայաստանին ԱՄՆ-ի կողմից դրամական օգնությունը տրամադրվում է անկախությունից անմիջապես հետո՝ 1992թ-ից: Անցած տարիների ընթացքում այն կազմել է մոտ 2 մլրդ դոլար գումար։ Արցախյան պատերազմի հրադադարի կնքումից հետո ԱՄՆ-ը սկսեց  օգնություն տրամադրել նաև Արցախին։

 

Վերջինիս օգնությունը հիմնականում տրամադրվում էր USAID-ի խողովակներով և   օգտագործվում էր պատերազմից հետո ականապատ տարածքների ականազերծման համար։ Այդ աշխատանքերը կատարվում էին հիմնականում “Halo trust” կազմակերպության միջոցով, որն ականազերծման աշխատանքներ կատարում է մի շարք հակամարտությունների գոտիներում։

 

Նշենք, որ ԱՄՆ-ն աշխարհի միակ պետությունն է ՀՀ-ից հետո, որն Արցախին օգնություն է տրամադրում։ Այս օգնությունը կանխելու համար Ադրբեջանական դիվանագիտությունը և նրա վարձած լոբբիստական կառույցները երկար տարիներ համառ պայքար էին մղում։

 

Ցավով կարող ենք փաստել, որ այս տարի առաջին անգամ Արցախին օգնություն նախատեսված չէ, ինչը նշանակում է, որ ականազերծման աշխատանքներն էականորեն կկրճատվեն։ Սակայն, այս իրավիճակին միայն ադրբեջանցիների ակտիվությանը վերագրելը սխալ կլինի: Կարծում ենք, այստեղ դեր է ունեցել նաև մեր դիվանագիտության և լոբբիստական կառույցների պասիվությունը։

 

Բացառված չէ նաև, որ սա հետևանք է այսպես կոչված հետհեղափոխական Հայաստանի արտաքին քաղաքականության մի շարք քայլերի, մասնավորապես սիրիական Հալեպ քաղաք ռազմական-ականազերծման և բժշկական օգնության տրամադրումը և այլն։ Հավանաբար Սպիտակ տունը այսպիսով իր դժգոհությունն է փորձում նաև հայտնել Իրանի հանդեպ Հայաստանի քաղաքականությանը, որը չի համընկնում ԱՄՆ-ի շահերին...

 

Պաշտոնական Երևանը պետք է ակտիվացնի իր դիվանագիտական ջանքերը Վաշիգտոնում: Լոբբիստական կառույցների և հայ համայնքի աջակցությամբ պետք է ոչ միայն մեծացնել Հայաստանին տարամադրվելիք օգնության չափը, այլև վերականգնել Արցախում անցկացվող ականազերծման աշխատանքները։ Հայաստանը պետք է ակտիվացնի դիվանագիտական շփումները ԱՄՆ պետքարտուղարության հետ՝ բացատրելով, որ շրջափակման մեջ գտնվող Հայաստանի համար Իրանի հետ հարաբերությունները ռազմավարական-անվտանգային նշանակություն ունեն, իսկ Արցախին օգնություն տրամադրելով ԱՄՆ-ն ուժեղացնում է իր դիրքերը Հարավային Կովկասում։

Լրահոս

Ամենաընթերցվածը

Նմանատիպ նորություններ