Հյուրընկալվելիս 2-0 հաշվով հաղթելով «Սաբուրթալոյին»՝ «Արարատ-Արմենիան» ընդհանուր պայքարում 3-2 հաշվով հաղթում է վրացական ակումբին՝ դուրս գալով Եվրոպա լիգայի որակավորման փլեյ-օֆֆ փուլ:

Հատկանշական է, որ ավելացված ժամանակի 3-րդ րոպեին վրացական ակումբը գոլ խփեց, որն արձանագրվելու դեպքում թիմերը պետք է լրացուցիչ ժամանակ անցկացնեին, սակայն մրցավարը խաղից դուրս վիճակ արձանագրեց:

Եզրափակիչ փուլում «Արարատ-Արմենիայի» մրցակիցը Լյուքսեմբուրգը ներկայացնող «Դյուդելանժն» է:

«Դյուդելանժը» Լյուքսեմբուրգի 2018/19թթ․ առաջնության չեմպիոնն է: Այս թիմը նախորդ մրցաշրջանում մասնակցել է Եվրոպա լիգայի խմբային փուլին և, «Բետիսի», «Օլիմպիակոսի» ու «Միլանի հետ ընդգրկված լինելով միևնույն խմբում, դուրս մնացել պայքարից (վաստակել է 1 միավոր՝ ոչ-ոքի խաղալով «Բետիսի» հետ):

«Դյուդելանժը» եվրագավաթային ընթացիկ մրցաշրջանը սկսել է Չեմպիոնների լիգայի որակավորման 1-ին փուլից և այնտեղ զիջել Մալթայի ներկայացուցիչ «Վալետային» (2-2, 1-1): Լյուքսեմբուրգյան ակումբը, հայտնվելով Եվրոպա լիգայի որակավորման 2-րդ փուլում, հաղթահարել է մակեդոնական «Շկենդիայի» արգելքը (2-1, 1-1):

Vnews.am