Ադրբեջանի ֆուտբոլի ֆեդերացիան բողոք է ներկայացրել ՈւԵՖԱ-ին Եվրոպա լիգայի խմբային փուլի 2-րդ տուրի՝ «Դյուդելանժ»-«Քարաբաղ» խաղի ժամանակ Արցախի դրոշի՝ դրոնով խաղադաշտում հայտնվելու հետ կապված։

«ԱՖՖ-ի ղեկավարությունն անմիջապես կապ է հաստատել ՈւԵՖԱ-ի հետ և իր մտահոգությունը հայտնել տեղի ունեցածի հետ կապված։ Բացի դա, ԱՖՖ-ն բողոք է ներկայացրել ՈւԵՖԱ-ին՝ պահանջելով համապատասխան քայլեր ձեռնարկել։

Մենք հույս ունենք, որ ՈւԵՖԱ-ն հետաքննություն կիրականացնի ու խաղի ընթացքում գրանցված տհաճ միջադեպի վերաբերյալ համապատասխան որոշում կկայացնի»,- ասվում է Ադրբեջանի ֆուտբոլի ֆեդերացիայի տարածած հաղորդագրության մեջ։

ՈւԵՖԱ-ն ևս հայտարարությամբ է հանդես եկել՝ ընդգծելով, որ իրենք կսպասեն հանդիպման պատվիրակների զեկույցին, որպեսզի հասկանան՝ կարգապահական գործ պե՞տք է բացել, թե՞ ոչ։