Չնայած <<Համաներման մասին>> օրենքն արդեն ընդունվել է և շատ բանտարկյալներ հասցրել են դուրս գալ բանտերից, սակայն օրենքի վերաբերյալ քննարկումները դեռևս չեն դադարել: Մասնավորապես, խստորեն քննադատվեց «Սասնա ծռեր» զինված խմբի անդամներին ներում շնորհելու և անչափահաս երեխաներին սովամահությունից փրկելու համար գողություն կատարած մորը համաներմամբ ազատ չարձակելու հանգամանքը:

Այս հարցի շուրջ ՀԱՅ ՁԱՅՆ լրատվականի հետ զրույցում ԱԺ <<Ծառուկյան>> խմբակցության պատգամավոր Գևորգ Պետրոսյանը, որը մասնագիտությամբ իրավաբան է, ասաց թե ցանկացած օրենք, եթե այս պահին ընդունվում է որպես անթերի, մեկ օր անց կարող է դառնալ քննադատության թիրախ, կարող է երևալ դրա թերություններն ու բացթողումները: «Այն, ինչը մենք չենք կարողացել ապահովել համաներման մասին օրենքով, խնդրեմ, դրա հնարավորությունն ունի Հանրապետության նախագահը՝ ներում շնորհելու տարբերակով: Այսինքն, մենք հիմա անտեսենք համաներման մասին օրենսդրական ակտի բոլոր առավելությունները և ընդամենը մեկ դեպքով գնահատենք համաներման ակտի որակը՝ իմ կարծիքով սխալ է>>:

ԱԺ պատգամավորն ասաց, թե ցանկացած դատապարտյալ մեկ օր առաջ ուզում է ազատ արձակվել, բայց համաներման օրենքը չպետք է միայն դատապարտյալի շահերից բխի, այս օրենքն ունի 3 շահառու:

<<Համաներումը չպետք է ընկալել բացառապես միայն կալանավորված, կամ դատապարտված անձանց նկատմամբ բարեգութ վերաբերմունք: Համաներումն ունի ևս երկու շահառու՝ պետությունը և հանցագործությունից տուժած անձիք, որոնք իրավաչափորեն ակնկալում են պետության արդարացի պատիժը, արդարացի վերաբերմուքը իրենց իրավունքը խախտած, հանձագործություն կատարած անձանց նկատմամբ:

Հիմա մենք պետք է այդ իրավակարգավորումներն իրականացնենք այնպես, որ այդ երեք շահառուներից ոչ մեկը ցավ չզգա, ոչ մեկի շահերը չվոտնահարենք»,- նշեց պարոն Պետրոսյանը՝ հավելելով, որ չկա բյուրեղյա, կատարյալ օրենք, և այն թերությունները, որ ի հայտ են եկել համաներման մասին օրենքում, դրանք կարող են լրացվել Հանրապետության նախագահի կողմից անհատական ներում շնորհելով: