Հայաստանը իր խորքում բաղկացած է իրենց հողին կրքոտ կերպով կապված գյուղացիներից: Հայերը չեն դադարել իրենց երկրում հաստատակամորեն բնակվելուց
Անտուան Մեյե

Բարերար Վարդան Նազիրեան կը պարգեւատրուի Ս. Ներսէս Շնորհալի կաթողիկոսական շքանշանով

am
barerar-vardan-nazirean-ke-pargeuatroui-s-nerses-snorhali-katoxikosakan-sqansanov

Կիրակի, Մայիս 5, 2019, Հայց. Առաքելական Եկեղեցւոյ Արեւմտեան Թեմի Սրբոց Ղեւոնդեանց Մայր Տաճարին մէջ, ինչպէս միշտ, բայցª այս անգամ առաւել եւս, ողողուած էր հաւատացեալնե-րու յորդահոս բազմութեամբ:

            Այդ օր, մեր մայրենի եկեղեցին կը տօնէր Ս. Զատկուան յաջորդող երրորդ Կիրակին, որ կը կոչուի նաեւ Աշխարհամատրան եւ Կանանչ Կիրակի: Պատարագիչն էր Մայր Տաճարի հովիւ Տէր Խաժակ քհնյ. Շահպազեան, իր կողքին ունենալով սարկաւագներու մեծաթիւ խումբ մը:

            Այդ օր գաղութիս ծանօթ երիտասարդ բարերարներէնª Ա.Մ.Ն.-ի, Հայաստանի եւ Արցախի ինչպէս նաեւ այլ երկիրներու մէջ իր աստուածահաճոյ բարերարութիւններով ծանօթª Վարդան Նազիրեան Ամենայն Հայոց Շնորհազարդ Հայրապետի կողմէ պարգեւատրուեցաւª Հայրապետական Ս. Ներսէս Շնորհալի Հայրապետի շքանշանով:

            Մօտաւորապէս առաւօտեան ժամը 11:45-ին, Սրբոց Ղեւոնդեանց Մայր Տաճարին մէջ, տեղի ունեցաւ շքանշանի տուչութեան հոգեպարար արարողութիւնը, նախագահութեամբª Թեմիս Բարեջան Առաջնորդ Գերշ. Տէր Յովնան Արք. Տէրտէրեանի:

            Պարգեւատրութեան ներկայ էին Թեմի երկարամեայ նախկին Առաջնորդ Գերշ. Տէր Վաչէ Արք. Յովսէփեան, Արեւմտեան Թեմի Առաջնորդի նախկին փոխանորդª Հոգշ. Տէր Տաճատ Ծ. Վրդ.  Եարտըմեան բազմավաստակ հոգեւորական Տէր Արշակ աւագ քհնյ. Խաչատուրեան եւ Ս. Յովհաննու Կարապետ եկեղեցւոյ հովիւ Տէր Մանուկ աւագ քհնյ. Մարգարեան:

            Մայր Տաճարի բազմանդամ երգչախումբը, ծանօթ արուեստագիտուհիª Ալենուշ Եղնազարի հոյակապ ղեկավարութեամբ          

            <<Ուրախ լեր սուրբ եկեղեցից

            Քանզի Քրիստոս արքայն երկնից

            Այսօր պսակեաց ըզքեզ խաչիւն իւրոյ>>:

շարականի երգեցողութեամբ, թափօրով բերուեցաւ Հայրապետական Կոնդակն ու Շքանշանը, բարերար Վարդան Նազիրեանի եւ իր զաւակներուն ընկերակցութեամբ:

            Ժողովուրդը խորագոյն հաւատքով կը մօտենար թափօրի դպիրներուն եւ սարկաւագներուն, անոնց զգեստները եւ խաչերը համբուրելով եւ հպելով:

            Տէր Մանուկ աւագ քհնյ. Մարգարեան Ս. Խորանէն կարդաց Ն.Ս.Օ.Տ.Տ. Գարեգին Բ. Շինարար Հայրապետին ղրկած Ս. Կոնդակը: Ապա, Թեմիս Բարեջան Առաջնորդը բարերարին կուրծքը զարդարեց Վեհափառ Հօր կողմէ շնորհուած Շքանշանով:

            Առաջնորդª Գերշ. Տ. Յովնան Սրբազան շատ յուզիչ եւ գեղեցիկ խօսքով վեր առաւ եւ մեծապէս գնահատեց Վարդան Նազիրեանի

եկեղեցական, հայրենական, Արցախի եւ հայ ժողովուրդին մատուցած բազմաբնոյթ ծառայութիւնները: Ապա ջերմ խօսքերով անոր մաղթեց երկար կեանք եւ նորանոր ծառայութիւն Աստուծոյ փառքին եւ հայրենիքի բարգաւաճման համար:

            Սուրբ Պատարագը շարունակուեցաւ: Աւարտին, Վարդան Նազիրեանի հարազատներէն, ընկերներէն մօտ 200 հրաւիրեալներ անցան Մայր Տաճարի <<Գալայճեան>> սրահը, սիրոյ սեղանի մը շուրջ շնորհաւորելու համար իրենց բարեկամին, հարազատին եւ ընկերոջը:

Գործադրուեցաւ գեղարուեստական յայտագիր մը, հանդիսավարութեամբ Տիկին Պերթա Պախչէճեանի: Ցուցադրուեցաւ մօտ 20 վայրկեաննոց հոյակապ ֆիլմ մը, ցոյց տալով բարերարին պատուաբեր ծառայութիւններէն նմոյշներ:

Խօսք առին Վարդան Նազիրեանի մօտիկ ընկերներէնª Խաչիկ Ճանոյեան եւ մեծարեալի զաւակները:

Շնորհակալութեան յուզիչ խօսքով ելոյթ ունեցաւ մեծարեալª Վարդան Նազիրեան:

Առաջնորդ Սրբազան Հօր փակման խօսքով եւ <<Պահպանիչ>>ով վերջ գտաւ սոյն յիշատակելի ձեռնարկը:

Մենք ալ մեր սրտագին շնորհաւորութիւնները կը յղենք մեծարեալին, մաղթելով իրեն կենսառողջ եւ արեւշատ օրերով լեցուն երջանիկ կեանք մը, միշտ իր կուրծքին վրայ հպարտօրէն կրելով հայրապետական այս օրհնաբեր շքանշանը:

<<Պատիւս արժանաւորաց>>:   

ԽԱՉԻԿ ՃԱՆՈՅԵԱՆ

Լրահոս

Ամենաընթերցվածը

Նմանատիպ նորություններ