Ով չի պատկանում իր հայրենիքին, նա չի պատկանում նաև մարդկությանը:
Վիսարիոն Բելինսկի

Բազմաբեւեռ ռազմավարութիւն

am
bazmabeuer-razmavaroutiun

Մեծն Քսանեակի՝ G20-ի վեհաժողովին, որուն նպատակն է զարկ տալ միջազգային տնտեսական աճին, կանոնակարգել միջազգային դրամագլուխի շրջանառութիւնը,… ջուրի երես ելան արեւմտեան պետութիւններու ներքին հակասութիւնները, յատկապէս Փութինի Ֆայնանշըլ Թայմզին տուած հարցազրոյցին ընդմէջէն, ուր ան կ՚աւետէր վախճանը եւրոպական ազատականութեան, որուն ձեւով մը համամիտ գտնուեցաւ նախագահ Թրամփ։

Առեւտրային դիւանագիտութիւնը որդեգրած նախագահ Թրամփ չյանդգնեցաւ յարձակիլ Իրանի Իսլամական Հանրապետութեան վրայ։ Նոյնն էր պարագան անցեալին Հիւսիսային Գորէայի, որ բանաւոր առճակատումէ ետք՝ յանգեցաւ բանակցային գործընթացի։ Իրաքի ներխուժումէն ետք, Ամերիկայի միջինարեւելեան քաղաքականութիւնը ապրեցաւ բազմաթիւ վերիվայրումներ կեդրոնացած՝ Աֆղանիստանի, Իրաքի եւ Սուրիոյ վրայ, ուր տարիներու ընթացքին զօրացան Ռուսաստանի եւ Իրանի դիրքերը։

Թուրքիան, որ սկզբնական շրջանէն ամերիկեան յարձակումին մշտապէս հակառակած է, այնտեղ նկատելով քրտական ինքնավարութեան ուրուականը, Ռուսաստանին փարեցաւ ամրապնդելու համար իր դիրքերը Սուրիոյ սահմանին եւ իր հակակշիռին տակ պահելու համար քրտական անկախամէտ ուժերը։

Ռուսաստանէն S-400 զինամթերքի գնումը Թուրքիան դրաւ ԱՄՆ-ու եւ ՕԹԱՆ-ի հետ յարաբերութիւններու խզման եզրին։ Այս հանգրուանին, ԱՄՆ-ն առճակատման մէջ է տարածաշրջանի կարեւոր պետութիւններուն՝ Սուրիոյ, Թուրքիոյ, Իրանի, Ռուսաստանի, ինչպէս նաեւ Չինաստանի հետ… 

Թրամփի ԱՄՆ-ու նախագահի պահապանողական, առեւտրամէտ մտայնութիւնը, անոր միջազգային յարաբերութիւններու մէջ երկկողմ յարաբերութիւն մշակելու ռազմավարութիւնը սեպ խրեցին նաեւ ԵՄ-ի հետ յարաբերութիւններուն մէջ։ Արեւմտեան աշխարհը կ՚ապրի շարք մը սուր տագնապներ, որոնք միջազգային ասպարէզին մէջ առիթ կու տան Ռուսաստանի ու Չինաստանի դիրքերու ամրապնդման։

Այս բարդ իրավիճակին մէջ Հայաստան կը մշակէ բազմաբեւեռ ճկուն քաղաքականութիւն, կ՚որոնէ բոլորին հետ լեզու գտնելու եւ գործակցելու միջոցներ, ամրապնդելու համար իր դիրքերը ընդդէմ Ազէրպայճանի եւ Թուրքիոյ յարձակողական դիրքորոշումին։ 

Ժ.Չ. / Աղբիւրը՝ ՆՈՐ ՅԱՌԱՋ

Լրահոս

Ամենաընթերցվածը

Նմանատիպ նորություններ