Մեր երկրում բոլոր ընտրություններն Արցախին պատիվ ու փառք են բերել, այս ընտրությունները ևս բացառություն չեն լինելու: Այս մասին այսօր լրագրողների հետ զրույցում ասաց Արցախի նախագահ Բակո Սահակյանը ընտրություններին մասնակցելուց հետո:

«Ավելի քան համոզված եմ, որ մենք հերթական անգամ իբրև ժողովրդավարության ուղի բռնած երկիր արձանագրելու ենք մեր հերթական հաջողությունը: Ցանկացած ընտրություն մեր երկրի առաջընթացն ապահովելու հնարավորություն է, իսկ ես, բնականաբար, քվեարկել եմ մեր երկրի առաջընթացի համար»,- նշեց նախագահը:

Նոր քաղաքապետից ունեցած ակնկալիքների մասին խոսելիս նախագահ Սահակյանը նշեց հետևյալը. «Մայրաքաղաքն այս տարիների ընթացքում ոչ միայն կերպարանափոխվել է, այլև նոր երանգ է ստացել: Կարծում եմ, նոր քաղաքապետն ու նոր վարչակազմը պետք է ունակ լինեն ապահովել զարգացման դինամիկան, ստեղծելու լրացուցիչ անհրաժեշտ պայմաններ քաղաքի զարգացման և շենացման համար: Մենք տարբեր բնույթի բազում  խնդիրներ ունենք, ես հնարավորություն եմ ունեցել հետևելու քաղաքապետի թեկնածուների նախընտրական ծրագրերին, կարծես թե նրանք բոլորն էլ հիմնականում պատկերացում ունեն քաղաքի խնդիրների մասին: Կարծում եմ, որ հաղթող թեկնածուն հաշվի կառնի քաղաքի անհրաժեշտ խնդիրները և կիրականացնի համապատասխան աշխատանք»:

Սահակյանը նշեց, որ ուրախացնող է, որ ավագանու թեկնածուները երիտասարդներ են: «Կարծում եմ, որ նախկին կազմի փորձառու աշխատակիցների հետ միասին կստեղծեն պայմաններ ու հնարավորություններ և կկատարեն իրենց պարտականությունները»,- ասաց Սահակյանը:

Հիշեցնենք, որ այսօր Արցախում ՏԻՄ ընտրություններ են: