Դա վարչապետի կոչ-հորդորն է, ես դա հանձնարարական չեմ դիտարկում: Այս մասին այսօր կառավարության նիսստից հետո լրագրողների հետ ճեպազրույցում ասաց ՊԵԿ ղեկավար Դավիթ Անանյանը՝ խոսելով նախօրեին Նորագավիթի մաքսատանը տեղի ունեցած միջադեպի մասին:

Հիշեցնենք, որ մաքսատուն կատարած այցի ժամանակ ՀՀ վարչապետ Նիկոլ Փաշինյանը, տեսնելով մաքսատան սենյակներից մեկում ՀՀ եռագույն դրոշը կեղտոտ և պատին հենած վիճակում, կարգադրել էր երիտասարդին դիմում գրել և հեռանալ աշխատանքից:

«ՊԵԿ կատարած այցելությունների արդյունքերով վարչապետն իր տպավորություններն է հայտնել հանրությանը: Դուք կենտրոնացել ենք մի փոքր էպիզոդի վրա, որը, ձեր կարծիքով, առևերևույթ սենսացիա է պարունակում: Այն, ինչը վարչապետը տեսավ, նրան դուր չեկավ և կոչեր կամ հորդորներ հնչեցրեց, որոնց մեր աշխատակիցը պատասխանել է իր դիմում գրելով: Եվ ոչ միայն այդ աշխատակիցը, մաքսատան պետը ևս ազատման դիմում է գրել: Դա այդ մարդկանց ընտրությունն է: Մնացած բոլոր աշխատակիցներին ոչ մեկը ոչ մի բան չի ասել: Մենք՝ ո՛չ ես, ո՛չ պարոն վարչապետը իրավունք չունենք մարդուն ազատել կամ չազատել աշխատանքից: Դա վարչապետի կոչ-հորդորն է, ես դա հանձնարարական չեմ դիտարկում: Ես բավարարել եմ աշխատակցի դիմումը, որն իր ընտրությունն է: Մաքսատան ղեկավարի՝ աշխատանքից ազատման դիմումը գրվել է, որը ես բավարարելու եմ»,- ասաց Անանյանը:

ՊԵԿ ղեկավարը հրաժարվեց պատասխանել մաքսատանը տեղի ունեցածի վերաբերյալ հարցերին: