Էրտողան դարձեալ քննադատած է Մաքրոնը

am es
ertoxan-darceal-qnnadatac-e-maqrone

“Ֆրանսա ապրող 700.000 Հայերուն պատգամ յղելը քեզ պիտի չփրկէ պարոն Մաքրոն”, ըսած է ան:

Թուրքիոյ նախագահ Էրտողան Շաբաթ, Ապրիլ 27-ին դարձեալ խստօրէն քննադատած է ֆրանսացի իր պաշտօնակիցը՝ Ապրիլ 24-ը Հայոց ցեղասպանութեան ոգեկոչման ազգային օր հռչակելուն պատճառով։ “Ֆրանսա ապրող 700.000 Հայերուն պատգամ յղելը քեզ պիտի չփրկէ պարոն Մաքրոն”, յայտարարած է Էրտողան, Անգարայի մօտերը իր կուսակցութեան պատասխանատուներուն հետ ունեցած հանդիպման։ “Նախ եւ առաջ սորվէ՛ քաղաքականութեան մէջ պարկեշտ ըլլալ, թէ ոչ՝ չես յաջողիր”, շարունակած է ան։ Թուրքիոյ նախագահը յայտարարած է, որ այս «յորդոր»-ը արդէն բազմաթիւ անգամներ անձամբ ալ ըրած է Ֆրանսայի նախագահին։ Ան աւելցուցած է, որ եթէ Թուրքիա իսկապէս գործադրած ըլլար այն ոճիրը, որ իրեն կը վերագրուի՝ “Այսօր միլիոնաւոր Հայեր չէին ապրեր Եւրոպայէն՝ Ամերիկա, Հիւսիսային Ափրիկէէն՝ Կովկաս”։

Փետրուարին Էրտողան ֆրանսացի իր պաշտօնակիցը արդէն յորջորջած էր «նորեկ»՝ քաղաքականութեան մէջ, ապա իր կարգին Ֆրանսան ամբաստանած էր Ալժերիոյ մէջ ցեղասպանութեան, ինչպէս նաեւ Ռուանտայի ցեղասպանութեան մեղսակցութեան յանցանքներով։

Վարչապետ Ֆիլիփ ալ Ֆրանսայի մէջ պետական մակարդակով ոգեկոչուած առաջին Ապրիլ 24-ին ունեցած իր ելոյթին յայտարարած էր, թէ Ֆրանսա պիտի աջակցի Հայոց ցեղասպանութեան ճանաչման՝ որպէս մարդկութեան դէմ ոճիր եւ երբեք պիտի չթոյլատրէ որեւէ կեղծիք եւ որեւէ ճնշում։

Աղբիւրը՝ Նոր Յառաջ

Լրահոս

Նմանատիպ նորություններ