ՀԱՅ ՁԱՅՆ լրատվականն արդեն տեղեկացրել էր, որ օրերս Թուրքիայի Արտաքին գործերի նախարար Մևլութ Չավուշօղլուն հյուրընկալել է hայ հոգևորականներին՝ Գերաշնորհ Տ. Խաժակ արքեպիսկոպոս Պարսամյանին և Տ. Շահե Ծայրագոյն Վարդապետ Անանյանին: Հայ հոգևորականները ներկայացել են որպես Ամենայն հայոց կաթողիկոս Գարեգին Բ Վեհափառ Հայրապետի ներկայացուցիչներ: Պատվիրակներին ուղեկցել է Ընդհանուր փոխանորդ Տ. Արամ արքեպիսկոպոս Աթեշյանը:

Թուրքագետ Տիրան Լոքմագյոզյանը ՀԱՅ ՁԱՅՆ լրատվականի հետ զրույցում նկատեց, որ հանդիպումը մի քիչ գաղտնիություն ուներ, և քչերին էր հայտնի, որ նման հանդիպում է նախապատրաստվում: «Հանդիպումից հետո էլ կոնկրետ ինչ-որ տեղեկություններ չկան, թե ինչի մասին խոսեցին և ինչ եզրահանգման հանգեցին: Սակայն զուտ հանդիպման փաստը ցույց է տալիս, որ ոչ միայն պատրիարքարանը, այլև Ամենայն հայոց կաթողիկոսը ինչ-որ կապեր ունի թուրքական պետությունում, ինչի շնորհիվ հնարավոր է եղել հանդիպման կազմակերումը»,- ասաց նա:

Լոքմագյոզյանը նշեց, որ վերջերս էլ Թուրքիայի նախագահ Ռեջեփ Թայիփ Էրդողանին էին հարց ուղղել հայկական պետության հետ կապերի մասին, ինչին ի պատասխան նա ասել էր՝ կամուրջները երբեք պետք չէ այրել, անգամ եթե թշնամի է դիմացդ. «Այդ պատասխանում տեսնում ենք Թուրքիայի կողմորոշումը: Այսինքն, այնպես չէ, ինչպես շատերը կարծում են, թե միայն Աթեշյանի հետ է Էրդողանը հարաբերություններ ստեղծում, այլ հայկական պետության հետ ընդհանրապես»:

Այս պահին նախադրյալներ կա՞ն մտածելու, որ Պոլսո Հայոց պատրիարքի ընտրության հարցը կլուծվի, հարց ուղղեցինք Լոքմագյոզյանին: Ի պատասխան նա նշեց. «Հավանական է, որ Թուրքիան ինչ-որ խոստումներ է տվել, սակայն թե այդ խոստումները որքանով կիրականանան և երբ, դա դեռ հարցական է: Եթե ասում են, որ կմտածեն այդ մասին և հարցերը կլուծեն, դեռ չի նշանակում, որ հենց վաղը այդ հարցերը կլուծվեն: Այդ հարցերը կարող են տարիներով ձգձգվել, կամ եթե անգամ լուծվեն, կարող են նոր հարցեր առաջանան: Հետևաբար՝ պետք է սպասել և տեսնել՝ ինչ է լինում»:

Թուրքագետը նշեց, որ ամբողջ հայ ժողովուրդը և իհարկե եկեղեցին հետաքրքրված են այս հարցով. «Մենք չորս նվիրապետական աթոռներ ունենք՝ երկու կաթողիկոսություն և երկու պատրիարքություն, և այդ պատրիարքություններից մեկը, որը շատ կարևոր է, և ներկայումս անորոշ վիճակում է: Ե՛վ եկեղեցին, և՛ հավատացյալներն այլևս չեն հանդուրժում ու չեն ցանկանում, որ այդպես շարունակվի: Ինչ-որ բան պետք է լինի, և , կարծում եմ, այդ ուղղությամբ աշխատանքներ են կատարվում»: