Հայ Մամուլի Համահայկական Համաժողովը

am es
hay-mamouli-hamahaykakan-hamajoxove

Ընթացիկ տարուան սկիզբին Տանն Կիլիկիոյ կաթողիկոս Արամ Ա. 2019 թուականը հռչակեց հայ մամուլի տարի:  Խօսքէն գործի անցնելով ան կազմակերպեց հայ մամուլի համահայկական ժողով մը որ տեղի ունեցաւ Տանն Կիլիկիոյ կաթողիկոսւթեան մայրավանքին մէջ, Անթիլիաս, Լիբանան, Յուլիս 2-4, 2019ին:

            Համաժողովը բացառիկ է կարգ մը տարողութիւններով:  Նախ ան կը համախմբեր բոլոր հոսանքներու խմբագիրները որոնք պայմաններու բերումով կը մնային օտար իրարու հանդէպ: Հասկնալի պատճառներով մասնակցողներու մեծամասնութիւնը կը ներկայացնէր Դաշնակցական հատուածի մամուլը:  Փոքրաթիւ ներկայացուցիչներ ռամկավար եւ հնչակեան մամուլէն կ'երաշխաւորէին «համահայկական» բնոյթը համաժողովին:

            Հոսանքներու այս մէկտեղումը յայտարար նշանն էր որ երբեմնի բուռն հակառակութիւնները մամուլի տարբեր օրկաններուն միջեւ տեղի տուած էին, կարելի դարձնելով համահայկական խնդիրներու հաւաքական քննարկումը:  Իսկապէս ալ՛ ընդհանրապէս, եղբայրական մթնոլորտի մը մէջ կայացան քննարկումները:

            Համաժողովին առթիւ մէկ յատկանիշն ալ այն էր որ գրեթէ առաջին անգամն ըլլալով սփիւռքի մէջ մէկ յարկի տակ կը հաւաքուէին սփիւռքի եւ հայրենիքի մամլոյ ներկայացուցիչները:  Հայաստանեան մամուլի ներկայացուցիչները կարծէք տարբեր մոլորակէ մը կու գային, այնքան տարուած Հայաստանի ներքին խնդիրներով:  Թէեւ սփիւռքի լրագրողները մօտէն կը հետաքրքրուին Հայաստանի իրադարձութիւններուն եւ մամուլի արտայայտութեանց, սակայն հայաստանցիներու պարագային ծանօթութիւնն ու հետաքրքրութիւնը սփիւռքի հարցերուն այնքան ալ հետաքրքրական նիւթեր չէին թուեր հայաստանցի լրագրողներուն համար:

            Պէտք է նշել նաեւ  յատուկ պարագայ մը- հրաւիրուած էին հայաստանեան մամուլի եւ լրատու այլ միջոցներու գլխաւոր դէմքերը – եւ շատեր համաձայնած  էին ալ - սակայն անոնք մեծ մասամբ բացակայ մնացին:

            Պէտք է ըսել որ կազմակերպիչ յանձնախումբը ջանադիր եղած էր առաւելագոյն կանոնաւորութեամբ համադրելու համագումարը, որ ընթացաւ ընդունելի սահունութեան մէջ:

            Որպէսզի զեկոյցներն ու բանավիճային փոխանակումները աւելի կիզակէտային բնոյթով ընթանային՝ յանձնախումբը սահմանած էր համագումարին նիւթերը, ինչպէս.

  • Հայաստան-սփիւռք համագործակցութիւն
  • Մամուլը եւ նորարար արհեստագիտութեան մարտահրաւէրները
  • Լրատուութիւնը եւ ընկերային ցանցեր
  • Տեղեկատուութեան անվտանգութիւնը
  • Համահայկական խնդիրներ
  • Հայ մամուլի դերը՝ հայ ինքնութեան պահպանման մէջ
  • Մամուլն ու բազմակարծութիւնը
  • Հայ մամուլն ու պահանջատիրութիւնը:

Զեկուցողները ընդհանրապէս ջանացին մնալ ծրագրուած սահմաններուն մէջ, սակայն տեղի ունեցան նաեւ կարգ մը զառածումներ:  Արդարեւ, սեղանի վրայ դրուած էին բաւական ընդգրկուն օրակարգեր, որոնց բոլորին կարելի չէր անդրադառնալ սպառիչ կերպով:

            Կարեւոր ազդակ մըն էր Արամ Ա. կաթողիկոսի տիրապետող ներկայութիւնը:  Անոր ընդարձակ, բովանդակալից ներածականը արդէն իր հունին մէջ դրաւ համաժողովը:  Ան ուշադիր կերպով մասնակցեցաւ ու հետեւեցաւ բոլոր նիստերուն, որոնց աւարտին ան կատարեց նիստերուն ամփոփումն ու եզրափակիչ սահմանումը:

            Ամբողջ համագումարին հետեւելէ ետք՝ Վեհափառը հանդէս եկաւ ամփոփիչ խօսքով ուր կար խոր հասկացողութիւն մամուլի դերին, առաքելութեան, գաղափարական ու գործնական բովանդակութեան ինչպէս նաեւ՝ իրապաշտ հեռանկարներուն:

            Ամբողջութեան մէջ ողջունելի նախաձեռնութիւն մըն էր որ իր անդրադարձը պիտի ունենայ անկասկած մամուլի ապագայ ընթացքին վրայ ինչպէս նաեւ ճամբայ պիտի հարթէ մամուլի աշխատողներու գործակցութեան:

            Իմացական իմաստով կասկած չկայ որ Արամ Ա. կաղողիկոս փայլուն աստղ մըն է:  Անոր մտաւորական պաշարը չէ սահմանուած միայն կրօնական ծիրով, այլ ան կը տարածուի նաեւ հայկական կեանքի տարբեր բնագաւառներու վրայ, մամուլէն սկսեալ մինչեւ քաղաքական բարդ խնդիրներու խորքը:

            Համագումարը հարստացաւ Վեհափառին ներշնչող ներկայութեամբ:

 

ԵՐՈՒԱՆԴ ԱԶԱՏԵԱՆ

Հատուկ ՀԱՅ ՁԱՅՆի համար

 

 

Նաեւ կարդացէք Երուանդ Ազատեանի զեկոյցը այստեղ:

 

Լրահոս

Նմանատիպ նորություններ