Գևորգ Էմին - Ես հայ եմ

Ես հայ եմ, հին, ինչպես լեառն այս բիբլիական,
Թաց են ոտքերս դեռ ջրհեղեղի ջրից,
Իմ սուրբ հողն է տեսել Նոյն առաջին անգամ,
Բաբելոնյան Բելը խորտակվել իմ սրից:

Կարդալ Ամբողջը

Հայաստանի Պետական Օրհներգը Պէտք Է Քայլ Պահէ Ժամանակին Հետ

am es
hayastani-petakan-orhnerge-petq-e-qayl-pahe-jamanakin-het

Հայաստանի վերանկախացման օրէն ի վեր մամուլի եւ լրատու այլ միջոցներու ծաւալով սկսած է բանավէճ մը մեր անկախ հայրենիքի խորհրդանշաններուն շուրջ - պետական դրօշ, զինանշան եւ օրհներգ: Յատկապէս օրհներգի պարագային որ աւելի հնչուն խորհրդանշան մըն է` բանավէճը դարձած է աւելի բուռն եւ կողմերու դիրքաւորումը` աւելի անտեղիտալի:

Ռամկավար Ազատական Կուսակցութեան մամուլը բազմաթիւ յօդուածներով, քննարկումներով եւ լուսաբանութիւններով մասնակցած է այդ բանավէճին եւ պարզած իր անխախտ դիրքաւորումը քննուած խնդրին շուրջ: Այժմու ՙՄեր Հայրենիք՚էն հրաժարելու եւ Արամ Խաչատուրեանի յօրինած պետականավայել օրհներգը որդեգրելու սկզբունքը լայն ժողովրդականութիւն կը վայելէ բանավէճին մասնակցող շրջանակներուն մօտ, բացի մէկ շրջանակէ:

Մեր պաշտպանութիւնը Խաչատուրեանի օրհներգին կը բխի կատարուած բազմաթիւ ուսումնասիրութիւններու եւ քննարկումներու արդիւնքին վրայ:

Բանավէճին հետեւողները կրնան դիւրութեամբ կռահել թէ ՙՄեր Հայրենիք՚ը պաշտպանելու եւ յաւերժացնելու ձգտումը մղուած է միայն քաղաքական նպատակներէ - եւ ոչ գեղարուեստական ու պատմական տուեալներէ:

Խաչատուրեանի օրհներգին ակունքները կը հասնին մինչեւ արմատները մեր հոգեւոր երաժըշտութեան` երաշխաւորելով անոր բովանդակութեան զուտ ազգային նկարագիրը. միւս կողմէ չարչրկուած ՙՄեր Հայրենիք՚ը կու գայ օտար աղբիւրներէ, իր ուսերուն շալկած լալկանութեան բեռը:

Հ.Յ.Դաշնակցութեան նորընտիր յարգարժան պետը ՙՄեր Հայրենիք՚ի պաշտպանողականին մէջ իսկ կ'առարկէ թէ օրհներգի ընտրութեան մէջ պէտք չէ միայն նկատի ունենալ երաժշտութեան գեղարուեստական արժանիքը: Արդարեւ, անուղղակի խոստովանութիւն մը Խաչատուրեանի երաժշտութեան գեղարուեստական գերազանց արժանիքին մասին:

Դաշնակցութեան եւ անոր համակիրներուն պատճառաբանութիւնը այն է որ ՙՄեր Հայրենիք՚ը կը բերէ վկայութիւնը ինքնապաշտպանութեան բազմաթիւ մարտերու, որով շահած պէտք է ըլլայ նուիրականութեան իրաւունքը: Սակայն, խորհրդանշանները բովանդակութիւն, իմաստ եւ մարմին կը զգենուն, երբ անոնց ետին գոյութիւն ունի կայուն պետութիւն մը: Եօթանասուն տարիներ ամբողջ ՙՄեր Հայրենիք՚ը դադրած էր խորհրդանիշ դառնալէ պետութեան մը եւ վերածուած էր քաղաքական հատուածի մը անջատողական լոզունգին: Աւելին` քաղաքական այլ պարտադրանքներու կողքին այդ օրհներգը դարձած էր Հայաստանի դէմ պայքարելու զօրակոչ` հակահամայնավար պայքարի պատրուակին ներքեւ: Եւ այդ պայքարը յաջողեցաւ շատ ազդու կերպով խրամատը լայնցնել հայրենիքի եւ սփիւռքի միջեւ իր աւերը տարածելով նաեւ ներսփիւռքեան շերտաւորումներու վրայ:

Երկու տարի մարմնաւոր հայրենիք մը խորհրդանշելէ վերջ, ՙՄեր Հայրենիք՚ը դարձաւ զօրակոչը հոգեկան հիւանդ հայրենիքի մը` հայութեան մնացեալ հատուածներուն դէմ:

Այնպէս ինչպէս փոխուեցան ՙՄեր Հայրենիք՚ի ՙթշուառ-անտէր՚ բառերը` ՙազատ-անկախ՚ի, կարելի է Խաչատուրեանի ՙՍովետական ազատ աշխարհ Հայաստանը՚ փոխել ՙյաւերժական ազատ աշխարհ Հայաստանի՚ եւ յաւերժացնել զայն` յաւերժացնելով նաեւ հայրենիքը:

Ի վերջոյ, օրհներգը պէտք է քալէ ժամանակին հետ:

ՌԱՄԿԱՎԱՐ ԱԶԱՏԱԿԱՆ ԿՈՒՍԱԿՑՈՒԹԵԱՆ

ԿԵԴՐՈՆԱԿԱՆ ՎԱՐՉՈՒԹԻՒՆ

ԳԵՐԱԳՈՅՆ ԽՈՐՀՈՒՐԴ

Փետրուար 9, 2019

Լրահոս

Ամենաընթերցվածը

Նմանատիպ նորություններ