Հայաստանից Սինգապուր արտահանումներն ամբողջությամբ են ազատվում մաքսատուրքից

am
hayastanic-singapour-artahanoumnern-amboxjoutyamb-en-azatvoum-maqsatourqic

Կառավարությունն իր այսօրվա նիստում հավանություն տվեց «Եվրասիական տնտեսական միության եւ նրա անդամ պետությունների՝ մի կողմից, եւ Սինգապուրի Հանրապետության՝ մյուս կողմից, միջեւ համապարփակ տնտեսական համագործակցության մասին» շրջանակային համաձայնագրի ստորագրման առաջարկությանը: Գործադիրը հավանություն տվեց նաեւ «Եվրասիական տնտեսական միության եւ նրա անդամ պետությունների՝ մի կողմից, եւ Սինգապուրի Հանրապետության՝ մյուս կողմից, միջեւ ազատ առեւտրի մասին» համաձայնագրի ստորագրման առաջարկությանը, ինչպես նաեւ «Հայաստանի Հանրապետության եւ Սինգապուրի Հանրապետության միջեւ ծառայությունների առեւտրի եւ ներդրումների մասին» համաձայնագրի ստորագրմանը:

Էկոնոմիկայի նախարար Տիգրան Խաչատրյանը նշեց, որ ԵՏՄ-ի եւ Սինգապուրի միջև առեւտրատնտեսական համագործակցության զարգացման մասին պայմանավորվածությունների միասնական փաթեթը մշակվել է Եվրասիական տնտեսական Բարձրագույն խորհրդի 2016 թվականի դեկտեմբերի 26-ի որոշմանը համաձայն։

«Համաձայնագրով ներառված են այնպիսի բաժիններ, ինչպիսիք են` «Ապրանքների առևտուրը», «Առևտրի պաշտպանական միջոցները», «Ապրանքների ծագումը որոշելու կանոնները», «Առևտրի տեխնիկական խոչընդոտները», «Մաքսային համագործակցությունը և առևտրի դյուրացումը», «Սանիտարական և բուսասանիտարական միջոցառումները», «Մտավոր սեփականությունը», «Էլեկտրոնային առևտուրը», «Պետական գնումները», «Մրցակցությունը», «Էկոլոգիա»»,- ասաց նա: 

Համապարփակ տնտեսական համագործակցության մասին համաձայնագրով նախատեսվում է կողմերի փոխազդեցության բազմակողմ զարգացման պարտավորություն, որի նպատակն է հանդիսանում ապրանքների եւ ծառայությունների առեւտրի խթանումը, կոոպերացիայի ընդլայնումը, ինչպես նաեւ կապիտալ ներդրումների, ընկերությունների հիմնադրման եւ գործունեության պաշտպանության ժամանակակից ստանդարտների ապահովումը։

Միաժամանակ, վերոնշյալ համաձայնագրով ամրագրվում է ապրանքների ազատ առեւտրի,ներդրումների եւ ծառայությունների մասով համաձայնագրերի կնքման կողմերի մտադրությունը՝ համաձայն վերջիններիս կողմից սահմանված կանոնների եւ իրավասությունների։

Սինգապուրի հետ անցկացվել է թվով 7 բանակցային փուլ: Համաձայնագրի նպատակն է ստեղծել շահավետ միջավայր եւ պայմաններ փոխադարձ առեւտրային հարաբերությունների զարգացման եւ փոխադարձ հետաքրքրություն ներկայացնող բնագավառներում Կողմերի միջեւ տնտեսական համագործակցության խթանման համար, ինչպես նաեւ վերացնել Կողմերի միջեւառեւտրային եւ ներդրումային խոչընդոտները, նվազեցնել բիզնեսի ծախսերը եւ բարձրացնել տնտեսական արդյունավետությունը:

Նախատեսվում է կարգավորել ավելի քան 12 հազար ապրանքատեսակի հետ կապված հարաբերություններ, որից 4800-ի մասով նախատեսվում է մաքստուրքի զրո տոկոսի կիրառում համաձայնագիրը ուժի մեջ մտնելուց անմիջապես հետո: Մյուս ապրանքատեսակների մասով զրո տոկոս մաքսատուրքը ուժի մեջ կդրվի 3-10 տարի հետո:

«Հայաստանի Հանրապետության եւ Սինգապուրի Հանրապետության միջեւ ծառայությունների առեւտրի եւ ներդրումների մասին» համաձայնագրով ազատականացվում է ապրանքերի առեւտուրը, Համաձայնագիրը: Ըստ էության, ազատականացնում է Հայաստանի եւ Սինգապուրի միջեւ ծառայությունների առեւտրի եւ ներդրումների իրականացման գործընթացները:

Ի տարբերություն ՀՀ կողմից նախկինում կնքված նմանատիպ համաձայնագրերի` Համաձայնագիրը ներառում է նաեւ գլուխ ծառայությունների առեւտրի մասին եւ համապատասխան հավելվածներ, որոնք ներառում են այն ոլորտները, որտեղ, համաձայն ՀՀ գործող օրենսդրության եւ ՀՀ կողմից կնքված միջազգային պայմանագրերի, առկա են որոշակի սահմանափակումներ օտարերկրացիների, այդ թվում` սինգապուրցիների համար:

Ընդորում` նախատեսված է նաեւ առանձին հավելված հետագայում հնարավոր կիրառելի սահմանափակող միջոցների վերաբերյալ:

Տիգրան Խաչատրյանը ընդգծեց, որ այս համաձայնագրերով ՀՀ-ից արտահանումները դեպի Սինգապուր ամբողջությամբ են ազատվում մաքսատուրքից:

Լրահոս

Նմանատիպ նորություններ