Հայրենիքը սիրում են ոչ թե նրա համար որ այն մեծ է, այլ նրա համար, որ այն քոնն է:
Սենեկա Կրտսեր

ՀԲԸՄ 90-րդ Ընդհանուր Համաժողովը Փարիզի Մէջ

am es
hbem-90-rd-endhanour-hamajoxove-parizi-mej

Հայկական Բարեգործական Ընդհանուր Միութեան 90-րդ Ընդհանուր Համաժողովը տեղի ունեցաւ Փետրուար 7-9, Փարիզի մէջ։

Պէտք է ըսել որ ժողովը կազմակերպուած էր շատ արհեստավարժ կերպով եւ ջանք չէր խնայուած կազմակերպուած արդիւնաւէտութիւնը ապահովելու։ Բացի պաշտօնական մասերէն, տեղի ունեցան նաեւ ընկերային հաւաքոյթներ, ճաշկերոյթներ եւ ընդունելութիւններ, բոլորն ալ՝ բարձր մակարդակով։

Նկատի ունենալով որ Հ.Բ.Ը.Միութիւնը հայաշխարհի մեծագոյն բարեսիրական, երիտասարդական եւ կրթական կազմակերպութիւնն է, ինչպէս նաեւ նկատի ունենալով սփիւռքի եւ Հայաստանի ներկայ ընկերային, քաղաքական եւ այլ զարգացումները, Բարեգործականի 90-րդ Ընդհանուր Համաժողովը կը զգենուր տարբեր, կարեւոր իմաստ։ Հաւանաբար ճակատագրական այս պահուն կազմակերպուած ժողովին, այս վերոյիշեալ պատճառներով հոն ներկայ էր նաեւ ՀՀ Վսեմաշուք Նախագահ Տիար Արմէն Սարգսեանը։ Յիշեցնենք որ Պրն. Նախագահը անդամ է նաեւ ՀԲԸՄ-ի Կեդրոնական Վարչութեան։

Հ.Բ.Ը.Միութեան 90-րդ Ընդհանուր Համաժողովին կը մասնակցէին Հայաստանէն եւ սփիւռքի բազմաթիւ գաղութներէն մասնաճիւղերու ներկայացուցիչներ, պատգամաւորներ, բարերարներ, Բարեգործականի առաքելութեան հաւատացող հայորդիներ եւ հիւրեր։ Մանաւանդ Եւրոպայի զանազան քաղաքներէն ներկայ էին հայ համայնքներու ղեկավար դէմքերէն շատերը։

Հոն էին նաեւԵրեւանի մօտ Ֆրանսայի դեսպան Ճոնաթան Լաքոթը, Ֆրանսայի մօտ ՀՀ դեսպան Յասմիկ Տոլմաճեանը, Եւրոմիութեան մօտ ՀՀ ներկայացուցիչ-դեսպան Թաթուլ Մարգարեանը, Հայաստան Համահայկական Հիմնադրամի Ֆրանսայի ներկայացուցիչ Պետրոս Թերզեանը, ուրիշնրեու շարքին Փաթրիք Տեւեճեանը, Մուրատ Փափազեանը եւ այլ համայնքային դէմքեր։

Եռօրեայ այս Համաժողովին առաջին երկու օրերը տրամադրուած էին խորհրդակցական հանդիպումներու՝ Կեդրոնական Վարչութեան եւ շրջաններու մասնաճիւղերու ներկայացուցիչներուն միջեւ։ Հոն քննուեցան շրջանները յուզող հարցերը, եղան հարցադրումներ, կազմուեցան ծրագիրներ եւ առնուեցան որոշումներ։ Նոր յանձնառարութիւններու մէջ մեծ էր դերը երիտասարդներու։

Հ.Բ.Ը.Միութեան ներկայ ժամանակներուն յարմարուելու, ազգային հարցերուն նոր մօտեցումներու եւ նոր առաքելութիւններու մասին եղան կարծիքներու փոխանակումներ, առողջ ինքնաքննադատութիւն եւ նոր ծրագիրներու մասին՝ խորհրդակցութիւններ։

Այս հանդիպումներուն, եւ նաեւ Համաժողովին, զգալի էր մեծ թիւով երիտասարդներու ներկայութիւնը։ «Երիտասարդ Արհեստաւորներ»ու (Young Professionals) մարմինները իրենց տարեկիցներուն եւ նորերուն համար արծարծեցին հարցեր եւ լուծումներ որոնեցին։ Եթէ երիտասարդներն են հարցեր արծածողներն ու լուծումներ որոնողները, կը նշանակէ որ «գործ»ը դրուած է ապահով ձեռքերու մէջ եւ Բարեգործականին ապագան աւելի փայլուն կրնայ ըլլալ։

Կեդրոնական Վարչութեան մէջ եղան որոշ փոփոխութիւններ եւ Վարչութիւնը թարմացաւ նոր եւ աւելի երիտասարդ անդամներով

Նոյնպէս, նշանակուեցաւ «Հոգաբարձական Մարմին» մը որ ելեւմտական եւ այլ հարցերու համար որպէս խորհրդատու պիտի ծառայէ։ «Հոգաբարձական Մարմին»ը պիտի գլխաւորէ Միութեան Բարերարներէն Պրն. Վաչէ Մանուկեանը։

Մօտիկ ապագային Համաժողովին մասին պիտի տանք այլ մանրամասնութիւններ եւս։

Վարդգէս Գուրուեան

«Հայ Ձայն»ի թղթակից

Լոս Անճելըս

Լրահոս

Ամենաընթերցվածը

Նմանատիպ նորություններ