Իմ քվեն տեխնիկական պատճառով գրանցվել էր «դեմ». Ռուբեն Ռուբինյանը՝ ԵԽԽՎ-ում կատարվածի մասին

am
im-qven-texnikakan-patjarov-grancvel-er-dem-rouben-roubinyane-exxv-oum-katarvaci-masin

Երեկ տեղի ունեցած քվեարկության ժամանակ իմ քվեն տեխնիկական պատճառով գրանցվել էր դեմ և ոչ թե կողմ, ինչի առնչությամբ այսօր հայտարություն արեցի ԵԽԽՎ լիագումար նիստի ժամանակ, և հայտարարությունս կցվեց նիստի արձանագրությանը։ Այս մասին իր ֆեյսբուքյան էջում գրում է ՀՀ Ազգային ժողովի արտաքին հարաբերությունների հանձնաժողովի ղեկավար, ԵԽԽՎ-ում հայկական պատվիրակության ղեկավար Ռուբեն Ռուբինյանը: 

«Ստրասբուրգում հայկական պատվիրակության անունից ողջունեցի վեհաժողով վերադարձած ռուսական պատվիրակությանը և վերջինիս ղեկավար Պյոտր Տոլստոյին։ Ուրախ էի կրկին հանդիպել նաև ՌԴ խորհրդարանի մեր գործընկեր հանձնաժողովի նախագահ Լեոնիդ Կալաշնիկովին, որը նույնպես պատվիրակության անդամ է։

Տեղեկացնեմ նաև, որ երեկ տեղի ունեցած քվեարկության ժամանակ, իմ քվեն տեխնիկական պատճառով գրանցվել էր դեմ և ոչ թե կողմ, ինչի առնչությամբ այսօր հայտարություն արեցի ԵԽԽՎ լիագումար նիստի ժամանակ և հայտարարությունս կցվեց նիստի արձանագրությանը։

Ի հեճուկս որոշ չարագուշակների, մեր և մեր ռուս գործընկերների միջև բացարձակապես ոչ մի խնդիր չի առաջացել, քննարկում ենք մերձեցման երեկո կազմակերպելու հարցը»,- գրել է նա՝ կցելով Պյոտր Տոլստոյի հետ իր լուսանկարը: 

Հիշեցնենք, որ Եվրոպայի խորհրդի խորհրդարանական վեհաժողովի քվեարկությանը մասնակցել է նաեւ հայաստանյան պատվիրակությունը: Հայաստանի Ազգային ժողովի «Լուսավոր Հայաստան» խմբակցության ղեկավար Էդմոն Մարուքյանը եւ ԲՀԿ խմբակցության պատգամավոր Նաիրա Զոհրաբյանը կողմ են քվեարկել բանաձեւին, որը հնարավորություն է տալիս Ռուսաստանին վերադառնալ ԵԽԽՎ: Մինչդեռ Ազգային ժողովի Արտաքին հարաբերությունների մշտական հանձնաժողովի նախագահ, իշխող կուսակցության անդամ Ռուբեն Ռուբինյանը դեմ քվեարկածների ցանկում է: «Իմ քայլը» դաշինքի մյուս անդամներ Հովհաննես Իգիթյանը, Տաթեւիկ Հայրապետյանը եւ Սոս Ավետիսյանը չեն մասնակցել քվեարկությանը:

 

Լրահոս

Նմանատիպ նորություններ