Կայացավ «Կորպորասիոն Ամերիկա Էյրփորթս» միջազգային համապատասխանության և  հակակոռուպցիոն համաժողովը

am en es
kayacav-korporasion-amerika-eyrports-mijazgayin-hamapatasxanoutyan-e-hakakoroupcion-hamajoxove

Այս տարի առաջին անգամ անցկացվել է «Պետական և մասնավոր հատվածներում թափանցիկության տանող կայուն ճանապարհ» խորագիրը կրող «Միջազգային համապատասխանության և հակակոռուպցիոն համաժողով 2019» միջոցառումը և որպես հյուրընկալող երկիր հանդես է եկել Հայաստանի Հանրապետությունը:

Գիտակցելով, որ գործարար աշխարհը չի կարող հեռու մնալ հակակոռուպցիոն պայքարի գործընթացներից՝ «Կորպորասիոն Ամերիկա Էյրփորթս» ընկերությունը (օդանավակայանների համաշխարհային մասնավոր խոշորագույն կառավարիչ ընկերություն է, որը Հայաստանում իրականացնում է Երևանի «Զվարթնոց» և Գյումրու «Շիրակ» միջազգային օդանավակայանների կառավարումը) նպատակ ունի ներկայացնել հակակոռուպցիոն և համապատասխանության իր սեփական փորձը, ներգրավել միջազգային փորձագետների` հակակոռուպցիոն և էթիկական համապատասխանության, կորպորատիվ կառավարման թեմաների վերաբերյալ քննարկում ծավալելու նպատակով, ինչպես նաև նպաստել պետական և մասնավոր հատվածների երկխոսությանը` հակակոռուպցիոն վարվելակերպի բարելավման նպատակով:

Համաժողովի մասնակիցներին բացման խոսքով ողջունել են ՀՀ փոխվարչապետ Տիգրան Ավինյանը, «Արմենիա միջազգային օդանավակայաններ» ընկերության գլխավոր մենեջեր Մարսելո Վենդեն և «Կորպորասիոն Ամերիկա Էյրփորթս» ընկերության համապատասխանության և ներքին հսկողության տնօրեն Գուստավո Նիկողոսյանը:
Պետական հատվածը ներկայացնող բանախոսները` ՀՀ արդարադատության նախարար Ռուստամ Բադասյանը և ՀՀ էկոնոմիկայի նախարարի տեղակալ Արման Հովնանյանը, կարևորելով բիզնեսի կողմից հակակոռուպցիոն հանձնառության ստանձնումը` ներկայացրեցին ՀՀ հակակոռուպցիոն ռազմավարության նախագծով ամրագրված մոտեցումները, ինչպես նաև կորպորատիվ կառավարման դերը:

Համաժողովի մասնակիցների համար հետաքրքիր և ուսանելի էր «Կորպորասիոն Ամերիկա Էյրփորթս» ընկերության` որպես Նյու Յորքի ֆոնդային բորսայում ցուցակված ընկերության փորձը: Այն ներկայացվեց ընկերության համապատասխանության և ներքին հսկողության տնօրեն Գուստավո Նիկողոսյանի ու ընկերության համապատասխանության և ներքին հսկողության տարածաշրջանային մենեջեր Պաբլո Խիլի կողմից:

ՀՀ խոշորագույն բիզնեսի և պետական հատվածի ավելի քան 150 ներկայացուցիչներ առիթ ունեցան լսելու միջազգային և տարածաշրջանային այնպիսի հեղինակավոր կազմակերպությունների ներկայացուցիչների ելույթներ, ինչպիսիք են` Միջազգային Մասնավոր Ձեռնարկատիրության Կենտրոնը (CIPE), Համաշխարհային համապատասխանության ասոցիացիան (WCA), Եվրոպական կորպորատիվ կառավարման ինստիտուտը (ECGI), Քորն Ֆերրի միջազգային ընկերությունը, Միջազգային Ֆինանսական Կորպորացիան (IFC), Դելոյթ և ՓրայսուոթերհաուսԿուպերս (PwC) աուդիտորական ընկերությունները, Զարգացման և Վերակառուցման Եվրոպական բանկը (EBRD), Թրանսփարենսի ինթերնեշնլը: Հայաստանի կորպորատիվ կառավարման հիմնական բնութագրիչները ներկայացվեցին Կորպորատիվ Կառավարման Կենտրոնի կողմից: ՖԱԹՖ-ի հակակոռուպցիոն բնույթի հանձնարարականներին և Հայաստանում դրանց ներդրմանն իր ելույթում անդրադարձավ ՀՀ ԿԲ ֆինանսական դիտարկումների կենտրոնի ներկայացուցիչը:

Կազմակերպությունների նման ներկայացվածությունը հնարավորություն տվեց բացահայտել համապատասխանության և լավ կառավարման տարբեր կողմերն ու դրանց անհրաժեշտությունը գործարար բարեվարք միջավայր և կայուն զարգացում ունենալու հարցում:

Լրահոս

Նմանատիպ նորություններ