Վայոց Ձորի մարզպետի օգնականի կողմից ծեծի ենթարկված փոխգնդապետի վիճակը շարունակում է մնալ ծայրահեղ ծանր, բժիշկներն ամեն ինչ անում են, որպեսզի վիճակը լավանա։ Այս մասին կառավարության նիստից հետո լրագրողների հետ ճեպազրույցում ասաց առողջապահության նախարար Արսեն Թորոսյանը, ով այսօր առավաոտյան այցելել էր սպային։

«Ամենօրյա կապի մեջ ենք, որպեսզի հասկանանք՝ դրական տեղաշրժ կա, թե՝ ոչ: Ցավք, այս պահին դեռևս չկա: Հնարավոր ամեն ինչ արվում է, որպեսզի կյանքը փրկվի և առողջությունը վերականգնվի»,- նշեց Թորոսյանը և հավելեց, որ այս պահին դրսում բուոժումը շարունակելու անհրաժեշտություն չի տեսնում, քանի որ փոխգնդապետը տեղափոխման ենթակա չէ:

Նախարարը խոսեց նաև անազատության մեջ գտնվող գեներալ Մանվել Գրիգորյանի առողջական վիճակի մասին: Այս առիթով նա նշեց. «Մանվել Գրիգորյանի առողջական վիճակն ամենասկզբից եղել է մեր ուշադրության կենտրոնում: Մասնակցում ենք բազմաթիվ փորձաքննությունների իրականացմանը։ Երկրորդը, քրեակատարողական հիմնարկից քաղաքացիական հիվանդանոց տեղափոխվելուց հետո մշտական հսկողության տակ է նա գտնվում թե կոնկրետ բուժհիմնարկի, թե իր կողմից նախընտրած բժիշկների կողմից։ Նաև արտասահմանից բժիշկներ կան ներգրավված, որոնք անհրաժեշտության դեպքում խորհուրդներ են տալիս։

Վիճակը գնահատում են կայուն, անհանգստանալու հրատապ ոչինչ չկա։ Ուզում եմ միանգամից պատասխանել մեղադրանքներին, երբ ասում են, որ՝ «սպանում են»։ Չկա նման բան։ Ամեն ինչ արվում է ցանկացած մարդու առողջությունը պահպանելու համար անկախ նրանց կարգավիճակից»,- նշեց Թորոսյանը։