Միրզոյանի սկանդալային հայտարարությունն ու փաստերի բացակայությունը. ի՞նչ խնդիր էր լուծում փոխվարչապետը

mirzoyani-skandalayin-haytararoutyounn-ou-pasteri-bacakayoutyoune-inc-xndir-er-loucoum-poxvarcapete

Առաջին փոխվարչապետ Արարատ Միրզոյանը գործադիրում իր աշխատանքի վերջին օրը սենսացիոն հայտարարություն արեց: Կառավարության նիստի ընթացքում նա հայտարարեց, թե Հայաստանում որդեգրման գործընթացի ոլորտում գործ ունենք մաֆիայի հետ և հավելեց, որ այս ամիսների ընթացքում փորձել է կծիկը քանդել, թվացել է՝ հասել է բացահայտման, բայց վերջնարդյունք չի կարողացել գրանցել։

«Մենք գործ ունենք ցավալի դեպքի հետ, այդ թվում՝ երեխաների օրգանների վաճառքի։ Մենք արդարադատության նախարարի հետ ենք խոսել, այց է կատարվել, ստուգվել, մինչև այս պահը եղածը իսկապես գոհացուցիչ է, որ ոչ մի վատ դեպք չի բացահայտվել։ Կասկած կա, որ երեք ուղղութամբ են երեխաներ որդեգրում արտասահման և այդ երկրները հայտնի են նաև այդ վատ առումով»,- ասաց Միրզոյանը։

Առաջին փոխվարչապետի այս հայտարարությանն արձագանքեցին Ազգային անվտանգության ծառայության տնօրենն ու ՀՀ գլխավոր դատախազը՝ նշելով, որ Հայաստանում երբևէ չի գրանցվել նման դեպք:

Միրզոյանի հայտարարությունն իր բովանդակությամբ ծանր հանցագործության վերաբերյալ հաղորդագրություն է, սակայն փոխվարչապետը չի բերում որևէ փաստ, այլ միայն հղում տալիս «օդում կախված ինչ-որ լուրերի»: Ավելին՝ և՛ վարչապետը, և՛ ուժային կառույցների ղեկավարներն անակնկալի են գալիս փոխվարչապետի հայտարարությունից: ԱԱԾ տնօրեն Արթուր Վանեցյանն էլ հավաստիացնում է, որ նման դեպք երբևէ չի եղել, որդեգրման գործընթացը գտնվում է խիստ հսկողության ներքո, և իրենք տիրապետում են ամբողջ ինֆորմացիային:

Առնվազն տարօրինակ է այն, որ Միրզոյանը հայտարարում է, թե ամիսներ շարունակ փորձել է բացել այդ կծիկը, կասկածներ է ունեցել որդեգրված երեխաների օրգանների հնարավոր վաճառքի վերաբերյալ և տեղյակ չի պահել պատկան մարմիններին: Միայն նշում է, թե զրուցել է Արդարադատության նախարարի հետ, որն էլ, ի դեպ, կառավարության նիստի ընթացքում չի հաստատում նման դեպքի հնարավորությունը:

Հարց է առաջանում՝ ինչո՞ւ է Արարատ Միրզոյանն այսպիսի հայտարարություն անում որպես փոխվարչապետ իր աշխատանքային վերջին օրը, երբ ժամեր անց ստանալու է պատգամավորական մանդատ և անցնելու խորհրդարանական աշխատանքի: Արդյո՞ք սա «աչքի ընկնելու» և անցած ամիսների իր աշխատանքը ինչ-որ կերպ արժևորելու փորձ չէ, թե՞ իրոք ոլորտում առկա է այդպիսի խնդիր, որի մասին դեռևս լռում են կառավարության անդամները:

Միրզոյանի հայտարարության հետքերով մենք մի փոքր ուսումնասիրություն իրականացրինք և պարզեցինք, որ գործող օրենսդրության ու միջազգային համաձայագրերի պահանջով՝ Հայաստանը խիստ ընթացակարգեր է սահմանել օտարերկրացիների կողմից ՀՀ քաղաքացի հանդիսացող երեխաների որդեգրման համար: Հայաստանն այն բացառիկ երկրներից է, որ որդեգրման երկարատև ու ժամանակատար ընթացակարգերից հետո 5 տարի շարունակ որդեգրող երկրի հետ միասին վերահսկում է այդ երեխաների հետագա կյանքը։ Որդեգրող երկրների կենտրոնական մարմինները Հայաստան են ուղարկում մանրամասն հաշվետվություն երեխայի առողջական վիճակի և կյանքի պայմանների մասին:

Նշենք նաև, որ մեր տեղեկություններով՝ օտարերկրացիները Հայաստանում որդեգրում են հիմնականում առողջական խնդիրներ ունեցող երեխաների, թեև սրա մասին պաշտոնական վիճակագրություն հնարավոր չեղավ գտնել:

Խնդրի առնչությամբ ՀԱՅ ՁԱՅՆ լրատվականը պաշտոնական հարցումով դիմել է ՀՀ արդարադատության նախարարության Քաղաքացիական կացության ակտերի գրանցման գործակալություն, որն իրականացնում է որդեգրման բնագավառում Հայաստանի կենտրոնական մարմնի գործառույթը: Պաշտոնական պատասխանը ստանալուց հետո մենք այն առանձին հրապարակմամբ կներկայացնենք մեր ընթերցողներին:

Մենք նաև փորձեցինք տեղեկություններ ստանալ ՀՀ աշխատանքի և սոցիալական հարցերի նախարարությունից, սակայն նախարարի և նրա մամուլի խոսնակի բացակայության պայմաններում (հիշեցնենք, որ նախարար Մանե Թանդիլյանը ԱԺ պատգամավորի մանդատ է ստացել) այդպես էլ հնարավոր չեղավ տեղեկություններ ստանալ խնդրի վերաբերյալ:

Լրահոս

Օրվա թեմաները

Ամենաընթերցվածը

Նմանատիպ նորություններ