Բոլոր իրավիճակներում միշտ ձգտում  եմ կոռեկտ լինել, բայց այսօր շատ դժվար կլինի, ուստի նախապես ներողություն եմ խնդրում:

Սա արդեն վերջն է: Եռաբլուրում պատերազմի հերոսների գերեզմաններ են պղծվում: Ընդ որում, դատելով լուսանկարի տեղադրման ժամկետից, դա արվել է դեռ երեկ:

Այս առումով մի քանի հարց պատկան մարմիններին: Սիրելի ԱԱԾ և Ոստիկանություն: Ես, որպես օրինապաշտ քաղաքացի, որպես հին ֆորմացիայի մարդ, ցանկանում եմ հասկանալ. 

• Դուք պատկերացնո՞ւմ եք, թե ինչ է նշանակում այս հանցագործությունը,
•  Դուք դեռ երեկ տեղյա՞կ էիք սրա մասին, թե այսօր ֆեյսբուքից իմացաք, ինչպես մենք,  
• Ֆեյսբուքում ակտիվորեն վարկածներ են շրջանառվում, իսկ ձեզ մոտ կա՞ն վարկածներ (իհարկե, այդ մասին հիմա պետք չէ բարձրաձայնել, ուղղակի կ՞ա լուրջ վարկած, թե՞ ոչ),
• Կարո՞ղ եք ինձ և մյուս օրինապաշտ, չքաղաքականացված, պետականամետ քաղաքացիներին հավաստիացնել, որ սա դիվերսանտների արած գործը չէ, և մենք ու մեր ընտանիքները կարող ենք հանգիստ քնել,
• Ով ասես այսօր չի վխտում Հայաստանում, ինչի մասին անձամբ ես մի քանի հոդված եմ գրել, ուստի կրկին նույն հարցն եմ ուղղում պատկան մարմիններին՝ դուք վստա՞հ եք, որ փողոցներում ընտանիքներով կամ խմբերով վխտացող, տարբեր գույների, երանգների, հիգիենիկ մակարդակի մարդիկ մեր երկրում գտնվում են բարի նպատակներով: Արդյո՞ք նրանց տեղաշարժը վերահսկվում է:

Իրականում, այս ամենն արդեն անցնում է բոլոր սահմանները: Երկիրը և նրա քաղաքացիներին աննորմալ աստիճանի քաղաքականացնելով, նրանց ուշադրությունը շեղելով՝ կամա թե ակամա այսօր իրական սպառնալիք է ստեղծվել պետության համար:

Սիրելի՜ պատկան մարմիններ, հայացքներդ շեղեք քաղաքական հարցերից և ձեր անմիջական գործով զբաղվեք, պաշտպանեք մեզ՝ քաղաքացիներիս: