Ռուսաստանից ադրբեջանցի լրագրող է վտարվում

rousastanic-adrbejanci-lragrox-e-vtarvoum

  Մայիսի 16-ին Մոսկվայում իրավապահները ձերբակալել են ծագումով ադրբեջանցի լրագրող Ֆուադ Աբասովին: Դատարանը նրա նկատմամբ կայացրել է կալանքի որոշում: Ներկայումս քննարկվում է Աբասովին Ադրբեջան վտարելու հարցը: Այս տեղեկատվությունը տարածվել է մոտ ապագայում Մոսկվայում էթնիկ ադրբեջանցիների համագումար անցկացնելու եւ «Ռուսաստանի ադրբեջանական համայնք» հասարակական կազմակերպություն ստեղծելու մասին խոսակցությունների ֆոնին: Ռուսաստանցի լրագրող Մաքսիմ Շեւչենկոն տեսակետ է հայտնել, որ Աբասովը «հետապնդման է ենթարկվել քաղաքական հայացքների համար, նրան Ռուսաստանից վտարում են հակաթուրքական եւ հակաադրբեջանական լոբբիստական շրջանակների պահանջով»:

  Ֆուադ Աբասովը Մոսկվայում բնակվում է արդեն շուրջ մեկ տասնամյակ: Նախապես նա Ռուսաստանի մայրաքաղաքում հավատարմագրվել է որպես թուրքական հեռուստաընկերություններից մեկի մեկնաբան, այնուհետեւ անցել ինքնուրույն գործունեության`որպես բլոգեր եւ քաղաքական վերլուծաբան: Ինչպես տեղեկացնում են ադրբեջանական աղբյուրները, Աբասովը տեւական ժամանակ ռուսական հեռուստաընկերություններում մասնակցել է քաղաքական թոք-շոուների` որպես «թուրք վերլուծաբան»: Ներկայումս նա մեղադրվում է Ռուսաստանի միգրացիոն օրենսդրությունը խախտելու, ՌԴ-ում ապօրինի բնակվելու, ինչպես նաեւ, երկրի սահմանը խախտելու մեջ: Ամենայն հավանականությամբ, Աբասովի դեմ քրեական գործ չի հարուցվի, նրան պարզապես կարտաքսեն Ադրբեջան, երկիր, որի քաղաքացին է հանդիսանում:

Թվում է` գործ ունենք ստանդարտ իրավիճակի հետ: Ցանկացած երկրում էլ օտարերկրացու նկատմամբ նման որոշում կարող է ընդունվել, եթե վերջինիս կեցության հետ կապված խնդիրներ են ծագում: Ադրբեջանում, սակայն, համոզված են, որ Աբասովի արտաքսումը բացառապես քաղաքական է եւ տեղի է ունենում հայկական լոբբիստական շրջանակների պահանջով: Չի բարձրաձայնվում, թե շարքային բլոգեր լինելով` Աբասովն ի՞նչ վնաս կարող էր հասցնել Ռուսաստանում Հայաստանի շահերին, որպեսզի հայկական լոբբիստական շրջանակներն ստիպված լինեին նրան ասպարեզից հեռացնելու: Ադրբեջանը նման դեպքերում բացառապես իռացիոնալ վարք է դրսեւորում` ամեն ինչում եւ ամենուր տեսնելով միայն հայկական հետք: Դա, հատկապես, ցայտուն է արտահայտվել Բաքվում Ռուսաստանի դեսպանատան դիմաց մայիսի 23-ին կազմակերպված բողոքի ակցիայի ընթացքում:    Մասնակիցները հիմնականում հակահայկական կարգախոսներ են հնչեցրել: Նրանք նաեւ խոսել են այն մասին, որ ռուս իրավապահներն Աբասովի նկատմամբ բռնություններ են գործադրել եւ պահանջել են պատասխանատվության ենթարկել մեղավորներին: Ակցիայի ժամանակ վիճաբանություն է ծագել մասնակիցների եւ Բաքվում ՌԴ դեսպանատան աշխատակիցների միջեւ: Դիտարժան է, որ ոստիկանությունը միջադեպին չի միջամտել: Ըստ երեւույթին, դա Ադրբեջանի իշխանությունների վերաբերմունքի դրսեւորում է: Աբասովի հետ կապված իրավիճակին որեւէ պաշտոնական արձագանք Բաքվից դեռեւս չի հնչել: Կատարվածին գնահատական չի տվել նաեւ Մոսկվայում Ադրբեջանի դեսպանատունը: Մեծ է հավանականությունը, որ Աբասովի արտաքսման հարցում շահագրգիռ կողմ է Մոսկվայի ադրբեջանական համայնքի թեւերից մեկը: Վերջին շրջանում տեղեկություններ են տարածվում, որ Մոսկվայի ադրբեջանական համայնքը բաժանված է մի քանի թեւերի, որոնք միմյանց հետ կատաղի մրցակցության մեջ են ՌԴ իշխանությունների հետ հարաբերություններում համայնքը ներկայացնելու հարցում:

   Ավելի վաղ ադրբեջանական լրատվամիջոցներում այդ խնդիրը բավական լայն քննարկվել է այն կտրվածքով, որ համայնքի մի քանի ազդեցիկ դեմքեր նույնիսկ մրցակցության մեջ են Մոսկվայում Ադրբեջանի արտակարգ եւ լիազոր դեսպան Փոլադ Բյուլբյուլօղլուի հետ: Վերջինս Մոսկվայում որոշակի «փոխհատուցման»  դիմաց կարգավորում է Ադրբեջանից արտագաղթածներին աշխատանքով ապահովելու, նրանց համար կեցության իրավունք ձեռք բերելու հարցերը: Դա բավական եկամտաբեր բիզնես է, որը նրա հետ ձգտում են կիսել Մոսկվայի ադրբեջանական համայնքի մի քանի ազդեցիկ դեմքեր: Ամենայն հավանականությամբ, որպես լրագրող հանդես եկող Ֆուադ Աբասովը նույնպես ներգրավված է եղել այդ մրցապայքարին: Եւ ահա, նրա մրցակիցներին հաջողվել է հասնել Աբասովի չեզոքացմանը: Դա է, թերեւս, պատճառը, որ Ադրբեջանը Ռուսաստանին որեւէ պաշտոնական պահանջ չի ներկայացնում Աբասովի հարցով:

   Իսկ բողոքի ակցիան, որ կազմակերպվել է ՌԴ դեսպանատան դիմաց, ամենայն հավանականությամբ մի նպատակ է հետապնդել` եւս մեկ անգամ հակահայկական կոչեր հնչեցնել, բարձրաձայնել Ռուսաստանի կողմից Հայաստանին «ցուցաբերվող աջակցության» մասին: Որեւէ հետք ռուս-ադրբեջանական հարաբերությունների վրա Ֆուադ Աբասովի արտաքսումը չի թողնի: Խնդիրը բացառապես իրավական է: Բայց դրանից հակահայկական աղմուկ, ինչպես տեսնում ենք, Բաքվում կարողացել են ստեղծել: Իրոք, Ադրբեջանի պարագայում իռացիոնալ երկրի հետ գործ ունենք:

Լրահոս

Նմանատիպ նորություններ