Անընդհատ խոսվում է, որ ընդունելության քննությունների թեստերը փոխվել են, երեխաների համար առաջադրանքները անծանոթ են եղել, դա ամենևին այդպես չէ: Այս մասին այսօր ԱԺ-ում լրագրողների հետ զրույցում ասաց կրթության, գիտության, մշակույթի և սպորտի նախարար Արայիկ Հարությունյանը:

Ըստ նախարարի՝ առաջադրանքները եղել են նույնը, սակայն որոշ տոկոսով փոխվել է բուն բովանդակությունը: Օրինակ, բեռնատարի փոխարեն գրվել է մարդատար:

«Եթե այս փոփոխության արդյունքում մեր դիմորդը ունենում է խնդիր, ապա դա վեր է հանում անգիրի խնդիրը, որը մենք ունենք, իսկ մեր աշակերտներին սովորեցրել են անգիր անել: Սրա արդյունքում ունեցել ենք կտրված դիմորդների թվի աճ, բայց եթե նախորդ տարի դա 16.5 տոկոս էր, ապա 19.5 տոկոս է: Սա ցույց է տալիս, որ համակարգը ամբողջությամբ հիմնված է եղել անգիրի վրա, և թեստերի փոփոխությունը պայմանավորված էր նրանով, որպեսզի բացահայտենք մտածող աշակերտներին, և լավագույնները կարողանան անցնել բուհեր: Ընդունելության հետ խնդիրներ ունեցող դիմորդներն էլ կարող են մյուս տարի փորձել և ընդունվել բուհեր նոր տրամաբանությամբ: Այս փոփոխությունը ջախջախում է կրկնուսույցների ինստիտուտը, քանի որ եթե կրկնուսույցներն անգիրի էին վարժեցնում, հիմա ստիպված են լինելու լրացուցիչ ջանքեր գործադրել: Իսկ ավելի ճիշտ կլինի, որ մեր աշակերտները հետևեն դպրոցական ծրագրին, քանի որ  բոլոր հարցերը եղել են դպրոցական ծրագրից»,- նշեց նախարարը: