Ով չի պատկանում իր հայրենիքին, նա չի պատկանում նաև մարդկությանը:
Վիսարիոն Բելինսկի

Թուրքիոյ խորհրդարանին ներկայացուած է Պոլսոյ Հայերուն նկատմամբ սաստկացող ատելութեան հարցը

am
tourqioy-xorhrdaranin-nerkayacouac-e-polsoy-hayeroun-nkatmamb-sastkacox-ateloutean-harce

Թուրքիոյ քրտամէտ Ժողովուրդներու ժողովրդավարական կուսակցութեան (HDP) երեսփոխանուհի Հիւտա Քայա Յունիս 11-ին խորհրդարանի քննարկումի նիւթ դարձուցած է Պոլսոյ Հայերուն դէմ կազմակերպուած յարձակումները:

Թուրքիոյ Ներքին գործոց նախարար Սիւլէյման Սոյլուին ուղղուած հարցումներուն մէջ, երեսփոխանուհին յատկապէս ընդգծած է Սամաթիոյ մէջ վերջին յարձակումէն ետք կատարուած՝ «Այս տակաւին սկիզբն է» սպառնալիքը, շեշտելով՝ որ անիկա խորացուցած է հայ բնակիչներուն մտահոգութիւնները: Ան աւելցուցած է, որ յարձակումէն ետք Հայերու տուներուն վրայ նշաններ դրուած են՝ ազդարարելով, որ «անոնց կեանքը իսկապէս վտանգի տակ է»։

Քայա նախարարէն պահանջած է պատասխանել հետեւեալ հարցումներուն.

1. Յարձակողներու ինքնութիւնը յայտնաբերելու ուղղութեամբ որեւէ հետաքննութիւն կը կատարուի՞ եւ եթէ կը կատարուի, ի՞նչ փուլի հասած է անիկա.

2. Նման յարձակումներ կանխելու համար նախարարութեան կողմէ կանխարգելիչ աշխատանքներ կը կատարուի՞ն.

3. Ձեր նախարարութիւնը ի՞նչ միջոցներու դիմած է կամ պիտի դիմէ Սամաթիոյ մեր քաղաքացիներուն ապահովութիւնը երաշխաւորելու համար.

4. Հայերու տուներուն վրայ նշաններ դնելու գծով հետաքննութիւն կը կատարուի՞: Եթէ այո՛, ի՞նչ փուլի մէջ է հետաքննութիւնը.

5. Ցարդ հայ քաղաքացիներու տուներուն վրայ նշաններ դրած անձերէն քանի՞ն յայտնաբերուած կամ պատժուած են.

6. Սամաթիոյ մեր հայ քաղաքացիներուն վրայ կատարուած ցեղապաշտական յարձակումներուն դէմ ի՞նչ քայլեր առնուած են.

7. Կառավարութեան ներկայացուցիչներուն կողմէ փոքրամասնութիւններու վերաբերեալ օգտագործուող նուաստացուցիչ հռետորաբանութիւնը որեւէ դեր խաղացա՞ծ է նման յարձակումներու բազմացման մէջ.

8. Տարբեր ազգային ծագում եւ հաւատք ունեցող մեր քաղաքացիներուն խաղաղ ու ապահով գոյութիւնը երաշխաւորելու համար պետական պաշտօնեաներու անջատողական, ատելութիւն քարոզող հռետորաբանութիւնը եւ քաղաքականութիւնը վերափոխելու ուղղութեամբ ի՞նչ աշխատանքներ կը նախատեսուին:

Յիշեցնենք, որ Մայիսի վերջերը, Պոլսոյ հայաշատ Սամաթիա թաղամասին մէջ բնակող հայաստանցի ընտանիքի մը մայրը դաշունահարուած էր իր տունը ներխուժած անծանօթներու կողմէ:

 

Աղբիւրը՝ Նոր Յառաջ

Լրահոս

Ամենաընթերցվածը

Նմանատիպ նորություններ